Ўзбекистонда “Инсон” ижтимоий волонтёрлик тизими шаклланмоқда
440 нафар волонтёрлар томонидан аҳолига жами 2000 соатдан ортиқ ёрдам кўрсатилди.
Бўстонлиқ туманида “Инсон” волонтёрлари учун ўқув жараёнлари ташкил этилди. Улар ногиронлиги бўлган шахслар, кексалар ҳамда ижтимоий қўллаб-қувватлашга муҳтож инсонларга ёрдам кўрсатади.
Қайд этилишича, бугунги кунда бу ташаббус шунчаки лойиҳа эмас, балки тизимли ишнинг бир қисмига айланди: пилот босқичда лойиҳа республиканинг 28 та ҳудудида (туманида) синовдан ўтказилди. Лойиҳа доирасида 440 нафар волонтёрлар томонидан аҳолига жами 2000 соатдан ортиқ ёрдам кўрсатилди, бу эса ижтимоий волонтёрликни ривожлантиришнинг долзарблиги ва самарадорлигини тасдиқлади.
Ўқув жараёнлари 250 нафар волонтёрни қамраб олиб, амалий ёрдам кўрсатиш, аҳоли билан ишлаш ва етакчилик кўникмаларини ривожлантиришга қаратилган.
“Ишончим комил, айнан шундай инсонлар орқали жамиятда янги ғамхўрлик маданияти шаклланмоқда. Шу боис биз волонтёрлар ҳамжамиятини ижтимоий ҳимоя тизимининг муҳим қисми сифатида ривожлантирмоқдамиз”, — дея таъкидлади Агентлик директорининг биринчи ўринбосари Шаҳноза Мирзиёева
Шунингдек, “Инсон” волонтёрлари ислоҳотлар ва аҳоли ҳаёти ўртасида боғловчи кўприкка айланаётгани қайд этилди.
