Навоийда ноқонуний олтин қазиб олган шахслар қўлга олинди

Навоий вилоятида ноқонуний олтин қазиб олиш билан боғлиқ икки ҳолат фош этилди. Бу ҳақда Zamon.uz'га ДХХ хабар берди.

 

Маълум қилинишича, вилоятда ўтказилган тезкор тадбир давомида давлат захирасидаги ерларда олтин сақловчи рудаларни қазиб олиш ва уларни кимёвий қайта ишлаш билан шуғулланган гуруҳ фаолиятига чек қўйилган.

 

Ушбу жиноий фаолиятга Самарқанд вилояти Пахтачи туманида яшовчи, 1988 йилда туғилган фуқаро бошчилик қилган. У Навоий вилояти Кармана туманида жойлашган паррандачиликка ихтисослашган хўжалик биносини ижарага олиб, у ерда яширин цех ташкил этган.

 

Тезкор тадбир давомида 200 килограмм ярим тайёр олтин, 200 қоп олтин моддаси мавжуд қум ва тошлар, 300 килограмм кимёвий воситалар, махсус лаборатория жиҳозлари, газ баллонлари ва бошқа ускуналар ашёвий далил сифатида мусодара қилинган. Дастлабки ҳисоб-китобларга кўра, мазкур ҳолат оқибатида давлат манфаатлари ва атроф-муҳитга етказилган зарар 7 миллиард сўмдан ортиқни ташкил этган.

 

Мазкур ҳолат юзасидан гумонланувчига нисбатан Жиноят кодексининг 196²-моддаси билан жиноят иши қўзғатилиб, тергов ҳаракатлари олиб борилмоқда.

 

Шунингдек, Навбаҳор туманида ҳам шунга ўхшаш ҳолат аниқланган. Унда маҳаллий масъулияти чекланган жамият раҳбари сохта рухсатнома асосида “Сармишсой” давлат музей-қўриқхонаси ҳудудида ноқонуний равишда олтин қазиб олиш ишларини ташкил этган.

 

Маълумотларга кўра, у 8 гектар майдонда 19 нафар фуқарони жалб қилган ҳолда қазиш ишларини амалга оширган. Тезкор тадбир давомида 6 килограмм ярим тайёр олтин, 430 тоннадан ортиқ олтин сақловчи рудалар, кимёвий воситалар, юк автомобиллари, юкловчи техникалар ҳамда бошқа ускуналар мусодара қилинган.

 

Дастлабки ҳисоб-китобларга кўра, мазкур ҳолатда 6,1 миллиард сўмлик қазилма бойликлар ноқонуний равишда ўзлаштирилган.

 

Ҳозирда ҳар икки ҳолат юзасидан лаборатория таҳлиллари тайинланган бўлиб, экология ва атроф-муҳитга етказилган зарар миқдори аниқланмоқда. Тергов ҳаракатлари давом этмоқда.