Жанубий Корея Президенти ва Исроил ўртасида дипломатик низо юзага келди

Жанубий Корея президенти фаластинлик бола исроиллик аскарлар томонидан қийноққа солиниб, томдан ташлангани акс этган видео билан бўлишгани ортидан кескин можаро юзага келди.

 

Маълум қилинишича, Исроил Ташқи ишлар вазирлиги бу воқеани 2024 йилда аллақачон текширилган ҳолат деб атаб, Жанубий Корея президенти Ли Же Мёнг “сохта аккаунт”га таяниб иш кўрганини билдирди. Жанубий Корея етакчиси эса Исроилни “инсонийликка зид ва ноқонуний ҳаракатлар” бўйича халқаро танқидларни эътиборсиз қолдирганликда айблади.

 

Исроил жума куни Жанубий Корея президенти Ли Же Мёнгни фаластинлик бола ўлдирилгани ва исроиллик аскарлар уни томдан ташлагани акс этган видеони улашгани учун кескин танқид қилди ва бу ҳолат “қабул қилиб бўлмас” ҳамда “қатъий қоралашга лойиқ” эканини билдирди.

 

Исроил томоннинг баёнотда айтилишича, Жанубий Корея Президенти улашган видео “Исроилга қарши дезинформация тарқатиши билан шуғулланадиган манбалар” томонидан ҳозирги воқеа сифатида нотўғри талқин қилинган.

 

Шунингдек, баёнотда  воқеа Исроил ҳарбийлари “террорчи” ҳисобланганларга қарши операция ўтказаётган вақтда содир бўлгани, аскарлар ҳаёти хавф остида бўлгани ва ҳолат “тўлиқ текширилиб, тегишли чоралар кўрилгани” таъкидланган.

 

Жанубий Корея президенти Ли Же Мёнг ижтимоий тармоқларда тарқалган видеони улашиб, унинг ҳақиқийлигини аниқлаш зарурлигини ва ҳолат жиддий текширилиши кераклигини таъкидлаган. У воқеани “уруш давридаги қотиллик” сифатида тилга олиб, уни тарихий адолатсизликлар, хусусан Холокост билан билан қиёслаган.

 

Кейинги постида Ли Исроилнинг баёнотлари билан боғлиқ янгиликлар хабарини ўртоқлашди ва "инсон ҳуқуқлари ва халқаро ҳуқуқнинг давомли бузилиши"дан ҳафсаласи пир бўлганини билдирди.