Ўзбекистон мусулмонлари идораси фуқароларни ҳажда фирибгарлардан эҳтиёт бўлишга чақирди
Ноқонуний йўллар билан ҳажга бориш қонунбузарлик ҳисобланиб, депортация ва катта миқдордаги жарималарга сабаб бўлиши мумкин.
Ўзбекистон мусулмонлари идораси фуқароларни ҳаж сафарини амалга оширишда фирибгарлар тузоғига тушиб қолмасликка чақирди.
Идора маълумотига кўра, сўнгги пайтларда ижтимоий тармоқларда ҳаж сафарига оид асоссиз ва ноқонуний таклифлар кўпайган. Натижада, ўтган йили юзлаб ўзбекистонликлар норасмий йўллар орқали ҳажга бориб, ибодатларини тўлиқ адо эта олмаган.
Қайд этилишича, айрим ҳолатларда фуқаролар депортация қилинган, жаримага тортилган, ҳатто жиддий оқибатлар кузатилган.
Таъкидланишича, Дин ишлари бўйича қўмита ҳамда Ўзбекистон мусулмонлари идораси ҳаж сафарларини Саудия Арабистони билан тузилган расмий келишувлар асосида ташкил этади.
Расмий баёнотда қайд этилишича, Саудия Арабистони қонунчилигига мувофиқ, ҳаж зиёрати фақат ваколатли ташкилотлар орқали амалга оширилиши мумкин. Ноқонуний йўллар билан ҳажга бориш қонунбузарлик ҳисобланиб, депортация ва катта миқдордаги жарималарга сабаб бўлиши мумкин.
Шу муносабат билан фуқароларга ҳаж сафарини фақат расмий, давлат томонидан ташкил этиладиган йўналишлар орқали амалга ошириш тавсия этилди.
