Ўзбекистонда 20 нафар аёл тадбиркор 1 миллиард сўмлик грантни қўлга киритди
Грант маблағлари IT, менторлик ва “яшил” энергетикага йўналтирилди.
Алишер Навоий номидаги Давлат академик катта театрида аёл тадбиркорларни қўллаб-қувватлашга қаратилган йирик грант дастури ғолиблари тақдирланди. Ташаббус Uzum ва Hamroh ҳамкорлигида амалга оширилди.
Тадбир давлат, бизнес ва эксперт доираларини бирлаштириб, амалий мулоқот ва янги имкониятлар майдонига айланди. Унда Зулайхо Маҳкамова, Дилфуза Нурматова ҳамда Светлана Хе иштирок этиб, аёллар тадбиркорлигини қўллаб-қувватлаш бўйича олиб борилаётган ишлар ва янги имкониятларга тўхталдилар.
Дастур доирасида 20 нафар ғолиб аёл тадбиркор аниқланди. Умумий 1 миллиард сўмлик грант маблағлари учта йўналиш — менторлик, ахборот технологиялари ва “яшил” энергетика бўйича тақсимланди.
Танловга тақдим этилган лойиҳалар технологик ечимлардан тортиб маҳаллий ишлаб чиқариш ва таълим ташаббусларигача бўлган кенг соҳаларни қамраб олди.
Тадбир давомида ғолибалар ўз тажрибаси билан ўртоқлашиб, бизнесни йўлга қўйиш жараёнидаги қийинчиликлар, қабул қилинган қарорлар ва шахсий ўсиш йўли ҳақида сўзлаб бердилар. Шунингдек, ташкил этилган кўргазмада иштирокчиларнинг маҳсулотлари ва лойиҳалари намойиш этилди.
Мазкур ташаббус давлат ва хусусий сектор ҳамкорлиги асосида аёлларнинг иқтисодий фаоллигини ошириш, янги иш ўринлари яратиш ҳамда замонавий тадбиркорлик муҳитини шакллантиришда муҳим қадам сифатида баҳоланмоқда.
