“4-5 долларлик бензинни қўмсаб қоласиз”: Эрон Трампнинг Ҳормуз блокадасига жавоб берди
Теҳрон блокадага жавобан бўғоздаги ҳар қандай ҳарбий кемаларга зарба берилиши мумкинлигини билдирди.
Исломобод музокаралари муваффақиятсиз якунлангач Трамп Ҳормуз бўғозида Эрон портларига кириб чиқадиган барча денгиз қатновлари тўхтатилишини маълум қилди. Теҳрон эса бундай чорага жавобан бўғоздаги ҳар қандай ҳарбий кемаларга зарба берилиши мумкинлигини билдирди. Бу ҳақда CNN ёзмоқда.
CNN хабарига кўра, АҚШ президенти Доналд Трамп Яқин Шарқдаги можаронинг 44-кунида АҚШ ва Эрон ўртасида тузилган икки ҳафталик вақтинчалик сулҳ амалда эканини айтган. Бу баёнот Покистонда ўтказилган, бироқ натижасиз якунланган музокаралардан сўнг берилди.
АҚШ ҳарбийлари президент топшириғига биноан душанба куни Шарқий вақт билан соат 10:00 дан бошлаб Ҳормуз бўғози орқали Эрон портларига кириб-чиқадиган барча денгиз қатновини блокадага олишини билдирган.
Эрон парламенти спикери Муҳаммад Бағир Ғолибаф Трампнинг Ҳормуз блокадасига жавобан, Оқ уй яқинидаги ёнилғи қуйиш шохобчаларида бензин нархи акс этган харитани Х саҳифасида эълон қилди.
“Ҳозирча, ёнилғи нархларидан завқланинг. ъБлокадаъда эса 4-5 долларлик бензин сиз учун носталгияга айланади” — деб ёзди Ғолибаф.
Блокада ҳақидаги хабарлар фонида якшанба куни нефть нархи яна баррели учун 100 доллардан ошди, Brent маркали нефть эса 8 фоизга қимматлашди. Таҳлилчиларга кўра, блокада жаҳон иқтисодиётига салбий таъсир кўрсатиши ва ёнилғи нархларини юқори даражада ушлаб туриши мумкин.
Шу билан бирга, минтақадаги дипломатик фаоллик ҳам давом этмоқда. Жорий ҳафта Исроил ва Ливан вакиллари ўртасида музокаралар ўтказилиши кутилмоқда. Айни пайтда Исроилнинг Эрон қўллаб-қувватлайдиган “Ҳизбуллоҳ”га қарши ҳужумлари давом этиб, қурбонлар борлиги хабар қилинмоқда.
Эрон олий раҳбари маслаҳатчиси Муҳсин Ризойи АҚШнинг денгиз блокадаси муваффақиятсизликка учрашини билдирди. Унинг сўзларига кўра, Эрон қуролли кучлари бундай ҳаракатларга йўл қўймайди ва таҳдидларга қарши туриш учун етарли салоҳиятга эга.
Шунингдек, у АҚШнинг бундай режаларини танқид қилиб, “Эрон твитлар ва хаёлий блокада режалари билан жиловланадиган мамлакат эмас”, дея таъкидлади.
