Ҳатайда Ўзбекистон иштирокида қурилган “Бухоро” масжиди очилди
Мазкур масжид мураккаб даврда Туркияга ўзбек халқининг беғараз ёрдам бергани ва бирдамлиги учун миннатдорчилик рамзи сифатида баҳоланмоқда.
Туркиянинг Ҳатай вилоятида Ўзбекистон томони иштирокида қурилган янги масжид фойдаланишга топширилди. Бу ҳақда “Дунё” ахборот агентлиги хабар берди.
Маълум қилинишича, Ўзбекистон кўмагида қурилган масжидга Туркиянинг мураккаб даврлардан бирида ўзбек халқи кўрсатган беғараз ёрдами ва бирдамлиги учун миннатдорчилик рамзи сифатида “Бухоро” номи берилди.
Янги ибодат маскани 3200га яқин хонадонни ўз ичига олган йирик турар-жой массивининг марказида жойлашган бўлиб, бир вақтнинг ўзида 500 кишини ўз ичига сиғдира олади. Бино замонавий архитектура, қулай шароитлар ва эстетик дизайни билан ажралиб туради.
Тадбир якунида иштирокчилар мазкур лойиҳа икки давлат ўртасидаги дўстона муносабатлар ва гуманитар ҳамкорликнинг янада мустаҳкамланишига хизмат қилишини таъкидлади.
