Австралияда илк бор аёл киши армия қўмондони бўлади
55 ёшли Сюзан Койл 39 йил олдин ҳарбий хизматни бошлаган бўлиб, қатор юқори лавозимларда ишлаб келган.
Австралия ҳукумати мамлакат мудофаа тизими раҳбариятидаги ўзгаришлар доирасида илк бор аёл кишини армия қўмондони лавозимига тайинланишини маълум қилди, дея хабар бермоқда Reuters.
Ҳукумат баёнотига кўра, ҳозирда Қўшма кучлар раҳбари бўлиб ишлаётган генерал-лейтенант Сюзан Койл жорий йил июль ойидан бошлаб армия қўмондони сифатида фаолиятини бошлайди. Койл бу лавозимда генерал-лейтенант Саймон Стюарт ўрнини эгаллайди.
Бош вазир Антони Албанезининг таъкидлашича, мазкур тайинлов Австралия армиясининг 125 йиллик тарихидаги илк ҳолат бўлади. Мудофаа вазири Ричард Марлес эса бу қарорни “жуда муҳим тарихий лаҳза” сифатида баҳоламоқда.
Койлнинг тайинланиши мамлакат қуролли кучларида аёллар улушини оширишга қаратилган сиёсат фонида амалга оширилмоқда. Айни пайтда, армия жинсий таъқиб ва камситиш билан боғлиқ тизимли муаммолар ҳақидаги айбловлар билан ҳам юзма-юз келмоқда.
Маълум қилинишича, 55 ёшли Койл 1987 йилда ҳарбий хизматни бошлаган бўлиб, қатор юқори лавозимларда ишлаган. У қуролли кучларга тўлиқ раҳбарлик қилган илк аёлга айланади.
Ҳозирда Австралия Мудофаа армияси таркибида аёллар тахминан 21 фоизни, юқори раҳбарият лавозимларида эса 18,5 фоизни ташкил этади. Қуролли кучлар 2030 йилга қадар бу кўрсаткични 25 фоизга етказишни режалаштирган.
Маълумот учун, ўтган йилнинг октябрь ойида Мудофаа армиясига қарши минглаб аёл зобитларни мунтазам жинсий тажовуз, таъқиб ва камситишдан ҳимоя қила олмагани учун жамоавий даъво қўзғатилган эди.
