Тошкент шаҳар ҳокимлиги 2025 йилнинг энг ёпиқ давлат ташкилоти бўлди

Очиқлик индексида Тошкент шаҳар ҳокимлиги 2025 йилда энг ёпиқ давлат органи сифатида қайд этилди. Бу ҳақда Коррупцияга қарши курашиш агентлиги хабар берди.

 

Маълум қилинишича, 2025 йил якунлари бўйича ўтказилган навбатдаги баҳолашда жами 97 та вазирлик, идора, муассаса ва маҳаллий давлат ҳокимияти органлари қамраб олинди. Баҳолаш жараёни 84 та мезонни ўз ичига олган 8 та индикатор асосида амалга оширилди. Баҳолаш якунида 66 та давлат органи “яшил”, 22 таси “сариқ” ва 9 таси “қизил” тоифадан ўрин олди.

 

Таққослашларга кўра, 2022 йилдаги илк баҳолаш натижаларига нисбатан “яшил” тоифадаги ташкилотлар сони 3,5 бараварга ошган. Шу билан бирга, “сариқ” тоифадагилар 2 бараварга, “қизил” тоифадагилар эса 3 бараварга камайган.

 

Очиқлик бўйича энг юқори кўрсаткичлар Навоий конь-металлургия комбинати, Ўзбекгидроэнерго, Ўзавтосаноат акциядорлик жамиятлари, Транспорт назорати инспекцияси, Олмалиқ конь-металлургия комбинати, шунингдек, Рақамли технологиялар вазирлиги ва Адлия вазирлиги томонидан қайд этилди.

 

Энг паст кўрсаткичлар эса республика даражасида Ўрмон ва яшил ҳудудларни кўпайтириш, чўлланишга қарши курашиш агентлиги ҳамда Ўзбекистон темир йўллари акциядорлик жамиятида, ҳудудий миқёсда эса Андижон вилояти ва Тошкент шаҳар ҳокимликларида кузатилиб, улар “қизил” тоифага киритилди.

 

Шунингдек, 2026 йилнинг иккинчи ярмидан бошлаб синов тариқасида Навоий вилояти туман ва шаҳар ҳокимликлари ҳамда ташкилотларининг очиқлик даражасини index.anticorruption.uz платформаси орқали баҳолаш кўзда тутилмоқда.