Андижонда фуқаро қудуқда қолиб кетди
Фуқаро 14 метр чуқурликда ҳаво етишмаслиги оқибатида пастда қолиб кетган. У қутқарувчилар томонидан юқорига олиб чиқилган.
Андижон вилоятининг Хўжаобод туманида қудуқда қолиб кетган фуқаронинг ҳаёти сақлаб қолинди. Бу ҳақда ФВВ маълум қилди.
Қайд этилишича, 14 апрель куни соат тахминан 11:30 ларда “Янгифарғона” МФЙ, Дўстлик кўчасидаги уйлардан бирида қудуқ қазиш жараёнида фуқаро 14 метр чуқурликда ҳаво етишмаслиги оқибатида пастда қолиб кетган.
Ҳодиса гувоҳлари зудлик билан Фавқулодда вазиятлар вазирлигига мурожаат қилган. Қутқарувчилар воқеа жойига тезкор етиб бориб, қудуқда ҳушини йўқотган фуқарони юқорига олиб чиққан.
Маълум қилинишича, қутқарувчиларнинг тезкор ҳаракатлари туфайли фуқаронинг ҳаёти сақлаб қолинган.
