Эрон араб давлатларидан товон пули талаб қилди
Яқин Шарқ мамлакатлари АҚШ ва Исроилнинг Эронга қарши урушида иштирок этиб, халқаро ҳуқуқни бузганликда айбланмоқда.
Эрон БМТ орқали Яқин Шарқдаги бир қатор давлатлардан компенсация талаб қилди. Бу ҳақда мамлакатнинг БМТдаги вакили Амир Саид Иравоний маълум қилди, дея хабар бермоқда AP.
Иравонийнинг таъкидлашича, мазкур давлатлар АҚШ ва Исроилнинг Эронга қарши ҳарбий ҳаракатларида иштирок этган ва шу орқали халқаро ҳуқуқни бузган.
Эрон давлат ОАВлари товон талаб қилинган давлатлар қаторига Баҳрайн, Саудия Арабистони, Қатар, Бирлашган Араб Амирликлари ҳамда Иордания киришини ёзмоқда.
IRNA тарқатган маълумотга кўра, Иравоний ушбу давлатлар Эрон Ислом Республикасига етказилган барча моддий ва маънавий зарарлар учун тўлиқ компенсация тўлаши шарт эканини билдирган.
Ҳозирча мазкур талаблар халқаро судларга киритилгани ёки амалий жараён бошлангани ҳақида расмий маълумот йўқ.
Аввалроқ АҚШ маъмурияти ҳам Эронга қарши ҳарбий операция харажатларини араб давлатлари ҳисобидан қопламоқчи экани ҳақида хабар берилганди.
