АҚШ Эронга қарши уруш харажатларини араб давлатларига тўлатмоқчи
Доналд Трамп мазкур масала юзасидан алоҳида баёнот беради.
АҚШ маъмурияти араб давлатлари томонидан Эронга қарши ҳарбий операция харажатларини қоплаш масаласини кўриб чиқмоқда. Бу ҳақда Оқ уй матбуот котиби Керолайн Левитт журналистлар учун ўтказилган брифингда маълум қилди.
Левиттнинг таъкидлашича, Доналд Трамп араб давлатларини ушбу ташаббусни қўллаб-қувватлашга чақиришдан манфаатдор бўлади. Оқ уй вакили президент бу масала юзасидан кейинчалик алоҳида баёнот беришини ҳам қўшимча қилди.
Аввалроқ, 28 февраль куни АҚШ ва Исроил Эрон ҳудудидаги қатор шаҳарларга ҳаво зарбалари бериб, ҳарбий операцияни бошлагани хабар қилинганди. Бунга жавобан Эрон Исроилга ракета ҳужумлари уюштирди, шунингдек Форс кўрфази ҳудудидаги АҚШ ҳарбий базаларига зарба берди.
Кескинлашган вазият фонида минтақанинг бир қатор давлатлари ҳаво ҳудудини вақтинча ёпди.
Шунингдек, АҚШ томонидан Эрон расмийларига Яқин Шарқдаги можарони тартибга солишга қаратилган 15 банддан иборат режа тақдим этилгани ҳам маълум қилинган. Эрон томони эса мазкур режаларни реал эмас, деб ҳисоблаган.
