Саудия Арабистони АҚШдан Ҳормуз блокадасини бекор қилишни талаб қилди
Саудия расмийлари вазият кескинлашганида Баб ал-Мандеб бўғози ҳам хавф остида қолиши мумкинлигини билдирди.
Саудия Арабистони АҚШдан Ҳормуз бўғозида жорий этилган блокадани бекор қилишни ҳамда Эрон билан музокараларни қайта тиклашни талаб қилмоқда. Бу ҳақда The Wall Street Journal манбаларга таяниб хабар берди.
Нашр маълумотларига кўра, Ар-Риёд АҚШ президенти Дональд Трамп томонидан қабул қилинган қарор минтақадаги кескинликни кучайтириши мумкинлигидан хавотирда. Саудия томони, айниқса, ушбу чоралар Эрон томонидан жавоб реакциясини келтириб чиқариб, глобал юк ташиш йўлларига салбий таъсир кўрсатиши эҳтимолини юқори баҳоламоқда.
Шунингдек, вазият кескинлашган тақдирда, яна бир стратегик йўлак — Баб ал-Мандеб бўғози ҳам хавф остида қолиши мумкинлиги таъкидланмоқда.
Қайд этилишича, Саудия Арабистони ҳозирда нефть экспортини муқобил йўллар орқали, хусусан чўл ҳудудлари орқали Қизил денгизга етказиб, урушдан олдинги даражага яқинлаштиришга эришган. Бироқ мутахассислар бу ечим узоқ муддатли барқарорликни таъминламаслигини қайд этмоқда.
Нашрга кўра, Баб ал-Мандеб бўғози атрофидаги айрим ҳудудлар Ҳусийлар ҳаракати назорати остида бўлиб, улар ушбу йўлак орқали ўтувчи кемалар хавфсизлигига таъсир кўрсатиши мумкин. Саудия манбалари ҳусийлар билан маълум даражада келишувга эришилганини билдирган бўлса-да, вазият беқарорлигича қолаётгани таъкидланмоқда.
Расмийларга кўра, агар минтақадаги босим кучайса, ҳусийлар можаро жараёнида фаолроқ иштирок этиши ёки ҳатто денгиз йўлакларидан фойдаланиш учун тўлов жорий этиши эҳтимоли мавжуд.
