Ўзбекистон “World Content Market”да илк бор миллий павильон билан иштирок этмоқда

 

Жорий йилда медиа ва рақамли контент соҳасидаги нуфузли халқаро тадбирлардан бири — “World Content Market” ўз ишини бошлади. Мазкур платформада илк бор Ўзбекистон миллий павильони ташкил этилиб, мамлакатнинг контент ишлаб чиқариш салоҳияти халқаро майдонда кенг намойиш этилмоқда.

 

2008 йилдан буён фаолият юритиб келаётган ушбу йирик медиа бозор телевидение ва рақамли контентни яратиш, тарқатиш, монетизация қилиш ҳамда халқаро ҳамкорликни ривожлантиришга хизмат қилиб келади. Тадбир ҳар йили дунёнинг турли давлатларидан медиа соҳаси вакилларини бир майдонга жамлаб, янги лойиҳалар ва ҳамкорлик имкониятларини яратади.

 

Жорий йилги тадбирда 20 га яқин давлатдан 1500 дан ортиқ медиа мутахассислари, 500 дан зиёд компаниялар иштирок этмоқда. Шунингдек, Жанубий Корея, Туркия, Ҳиндистон, Россия, МДҲ давлатлари, Хитой ва Бирлашган Араб Амирликлари каби давлатларнинг миллий экспозициялари ҳам намойиш этилмоқда.

 

Иштирокчилар орасида 150 дан ортиқ телеканаллар, 40 дан зиёд ОТТ платформалар ва видео-порталлар, 200 дан ортиқ контент дистрибюторлари, 100 дан ортиқ продюсерлар ҳамда ишлаб чиқариш студиялари мавжуд.

 

Ўзбекистон миллий павильонида 10 дан ортиқ хусусий контент ишлаб чиқарувчилар томонидан 500 дан ортиқ ўзбек бадиий фильмлари ва сериаллари халқаро харидорлар эътиборига тақдим этилмоқда.

 

Мазкур павильон доирасида ўзбек миллий контентини хорижий телеканаллар ва рақамли платформаларга олиб чиқиш, шунингдек экспорт салоҳиятини кенгайтириш бўйича музокаралар олиб борилмоқда.

 

Мутахассислар фикрича, Ўзбекистоннинг ушбу халқаро медиа майдондаги илк миллий павильон билан иштироки мамлакатда контент саноатини ривожлантириш, маҳаллий ижодкорларни қўллаб-қувватлаш ҳамда ўзбек маданий маҳсулотларини глобал бозорга олиб чиқишда муҳим стратегик қадам бўлиб хизмат қилади.