Ўзбекистонда дала четларига экин экмаганлар жаримага тортилади

Ўзбекистонда қишлоқ хўжалиги ерларидан самарали фойдаланишни таъминлашга қаратилган янги тартиб жорий этилмоқда. Унга кўра, 2026 йил 14 июлдан бошлаб дала четларига экин экмаган шахслар маъмурий жавобгарликка тортилади.

 

Қонун билан бир қатор норматив-ҳуқуқий ҳужжатларга ўзгартириш ва қўшимчалар киритилган. Хусусан, Маъмурий жавобгарлик тўғрисидаги кодексга киритилган нормаларга мувофиқ, иккиламчи ижарага олган шахслар томонидан қишлоқ хўжалиги ерларининг дала четларида — канал, суғориш ҳамда коллектор-дренаж тармоқлари атрофида белгиланган майдон ва муддатларда мақбул экин экилмагани учун жарима қўлланади.

 

Жарима миқдори базавий ҳисоблаш миқдорининг (БҲМ) 1 бараваридан 3 бараваригача, яъни 412 минг сўмдан 1 миллион 236 минг сўмгача этиб белгиланган.

 

Шунингдек, Солиқ кодексига киритилган қўшимчаларга асосан, Ўсимликлар карантини ва ҳимояси агентлиги ҳар йили 1 майга қадар мазкур майдонларда экин экилмаган ерлар ҳамда уларнинг эгалари тўғрисидаги маълумотларни давлат солиқ органларига электрон шаклда тақдим этиши шарт. Ушбу маълумотлар асосида экин экилмаган ер участкаларининг тегишли қисми учун ер солиғи ставкаси уч баравар оширилган ҳолда ҳисобланади.

 

Мазкур қонун 2025 йил 15 июлда Қонунчилик палатаси томонидан қабул қилинган ва 31 октябрда Сенат томонидан маъқулланган. Ҳужжат қишлоқ хўжалиги ерларидан самарали фойдаланиш, аҳолини асосий озиқ-овқат маҳсулотлари билан таъминлаш ҳамда экспорт салоҳиятини оширишга хизмат қилиши қайд этилган.

 

Аввалроқ 2025 йил февраль ойида кучга кирган тартибга мувофиқ, томорқа ерларини қаровсиз қолдирган хонадон эгалари учун ҳам уч баравар оширилган солиқ ставкаси жорий этилган эди.