Эрондан уч нафар Ўзбекистон фуқароси эвакуация қилинди
Россия томонидан кескин вазият фонида 600 дан ортиқ хорижлик Эрон ҳудудидан олиб чиқилган.
Эронда юзага келган кескин вазият фонида Россия томонидан кенг кўламли эвакуация тадбири амалга оширилди. Ушбу жараён доирасида жами 632 нафар шахс хавфсиз ҳудудларга олиб чиқилган. Бу ҳақда Риа новости хабар берди.
Эвакуация қилинганлар орасида турли мамлакатлар фуқаролари, жумладан Ўзбекистон фуқаролари ҳам бор. Хусусан, уч нафар ўзбекистонлик уюшган гуруҳлар таркибида мамлакат ҳудудидан олиб чиқилган.
Маълум қилинишича, эвакуация кучли бомбардимон ва ракета зарбалари фонида ташкил этилган. Жараён давомида тўртта махсус парвоз орқали фуқароларнинг жанговар ҳудуддан хавфсиз чиқиб кетиши таъминланган.
Эвакуация қилинганлар орасида Бушеҳр атом электр станцияси ходимлари ва уларнинг оила аъзолари ҳам бор. Шунингдек, 81 нафар Беларус, 27 нафар Тожикистон фуқаролари, шунингдек Арманистон, Қозоғистон ва Украина фуқаролари ҳам эвакуация қилинган.
Расмийларга кўра, эвакуация жараёни минтақадаги хавфсизлик вазиятидан келиб чиқиб амалга оширилган бўлиб, фуқароларнинг ҳаёти ва соғлиғини ҳимоя қилиш устувор вазифа сифатида белгиланган.
