Путинга исталган мамлакатга ҳужум қилиш ваколати берилди
Давлат Думаси президентга россияликлар таъқибга учраётган мамлакатларга қўшин киритиш ваколатини берувчи қонун лойиҳасини қабул қилди.
Россия Давлат думаси Россия фуқароларини хорижда ҳимоя қилиш мақсадида мамлакат Қуролли кучларидан фойдаланиш имконини берувчи қонун лойиҳасини биринчи ўқишда қабул қилди. Бу ҳақда “Интерфакс” хабар берди.
Қонун лойиҳасига кўра, президент қарори асосида Россия Қуролли кучлари бўлинмаларидан мамлакат ҳудудидан ташқарида фойдаланиш мумкин бўлади. Ташаббус, аввало, россияликлар чет давлатларда ҳибсга олиниши, ушлаб турилиши ёки жиноий ва бошқа турдаги таъқибларга дучор бўлиши ҳолатларида уларнинг ҳуқуқларини ҳимоя қилишга қаратилган.
Ҳужжат изоҳида қайд этилишича, мазкур механизм Россия иштирокисиз фаолият юритаётган хорижий судлар ёки халқаро органлар қарорлари асосида фуқароларга нисбатан чоралар қўлланилганда ишга туширилиши мумкин. Хусусан, Россия билан халқаро шартномага эга бўлмаган ёки БМТ Хавфсизлик кенгаши резолюцияларига асосланмаган суд қарорлари назарда тутилмоқда.
Амалдаги қонунчиликка мувофиқ, Россия президенти мамлакат манфаатларига зид деб ҳисобланган хорижий ёки халқаро қарорлар ва ҳаракатлар юзасидан фуқароларни ҳимоя қилиш чораларини кўриш ваколатига эга.
Давлат думасининг Мудофаа қўмитаси ушбу ташаббусни қўллаб-қувватлаб, у Россия фуқаролари ва ташкилотларини хориждаги ноқонуний босимлардан ҳимоя қилишга хизмат қилишини таъкидлади. Қўмита раиси Андрей Картаполовнинг билдиришича, лойиҳа, шунингдек, ташқи майдонда давом этаётган русофобия кайфиятларига қарши туришга ҳам қаратилган.
