Россия Хитойга энергетика соҳасида ёрдам беришга тайёр — Россия ТИВ
Сергей Лавров икки давлат ташқи босимлардан мустақил равишда энергетика соҳасида ҳамкорликни чуқурлаштириш имконига эгалигини билдирди.
Россия Хитойга энергия етказиб беришни оширишга тайёр. Бу ҳақда Россия ташқи ишлар вазири Сергей Лавров чоршанба куни Пекинда ўтказилган матбуот анжуманида маълум қилди.
Россия ахборот агентликлари Лавровнинг сўзларига таяниб, Россия президенти Владимир Путиннинг Хитойга кутилаётган ташрифи йилнинг биринчи ярмида бўлиб ўтишини билдирган. “Ведомости” газетаси эса манбаларига таяниб, ушбу ташриф 18 майдан бошланадиган ҳафта давомида амалга оширилишини ёзган.
Хитой раҳбари Си Жинпин чоршанба куни Лавров билан учрашиб, Москвага нисбатан дўстона муносабатни тасдиқлади ва Хитой ҳамда Россия ўзаро ишончни мустаҳкамлаши, ҳамкорликни чуқурлаштириши ҳамда бир-бирининг манфаатларини ҳимоя қилиши зарурлигини таъкидлади.
Бундан ташқари, АҚШ президенти Доналд Трамп ҳам саккиз йил ичидаги илк Хитой ташрифи доирасида 14–15 май кунлари Си Жинпин билан учрашиши режалаштирилган.
Лавровнинг айтишича, Россия Яқин Шарқдаги инқироз оқибатида юзага келган энергия тақчиллигини қоплаш учун Хитой ва бошқа давлатларга қўшимча энергия етказиб беришни таъминлашга тайёр.
“Россия Хитой ва биз билан тенг ҳамда ўзаро манфаатли асосда ҳамкорлик қилаётган бошқа давлатлар дуч келаётган ресурс етишмовчилигини қоплаб бера олади”, — деди вазир.
У, шунингдек, Россия ва Хитой АҚШнинг Яқин Шарқдаги можаролар орқали глобал энергия бозорларига таъсир ўтказишга қаратилган ҳаракатларига қарам бўлиб қолмаслик учун етарли имкониятларга эга эканини таъкидлади.
Лавровга кўра, мавжуд, захира ва режалаштирилган қувватлар бундай босимлардан қочиш имконини беради ва бу глобал иқтисодиётга салбий таъсир кўрсатадиган омиллардан бири ҳисобланади.
