Россияга алоқадор хакерлар Украина прокурорларининг электрон почта аккаунтларини бузган — Reuters
Шунга ўхшаш ҳолатлар Руминия, Греция, Болгария ва Сербияда ҳам қайд этилган.
Россияга алоқадор хакерлар Украина прокурорлари ва терговчиларининг 170 дан ортиқ электрон почта аккаунтларини бузган. Бу ҳақда Reuters хабар берди.
Маълум қилинишича, хакерлик ҳужумлари 2024 йил сентябридан 2026 йил мартигача давом этган бўлиб, умумий ҳисобда камида 284 та электрон почта аккоунти бузилган. Киберҳужумлар содир бўлгани хакерлар томонидан тасодифан очиқ қолдирилган сервер орқали британиялик ҳамда америкалик киберхавфсизлик мутахассисларидан иборат Ctrl-Альт-Интел гуруҳи томонидан аниқланган.
Таҳлилларга кўра, ҳужумлар асосан Украина ҳуқуқ-тартибот органлари ходимларига қаратилган. Хусусан, ҳарбий соҳадаги коррупция ва жосусликка қарши курашувчи махсус прокуратура, Активларни бошқариш агентлиги (АРМА) ҳамда прокурорлар малака ошириш маркази ходимлари нишонга олинган.
Жабрланганлар орасида АРМА собиқ раҳбари Ярослава Максименко ҳамда прокурорлар маркази директор ўринбосари Олег Дука бор. Шунингдек, Коррупцияга қарши ихтисослашган прокуратуранинг юқори лавозимли ходимларидан бирининг маълумотлари қўлга киритилгани айтилмоқда.
Экспертлар фикрича, хакерлар Украина терговчиларидан олдинда бўлиш ёки юқори мартабали амалдорлар ҳақида муҳим маълумотларни қўлга киритишни мақсад қилган.
Мазкур кампания “Fancy Bear” номи билан танилган Россия ҳарбий хакерлик гуруҳига боғланмоқда. Бироқ айрим киберхавфсизлик мутахассислари бу гуруҳнинг бевосита иштирокини тасдиқламаган.
Маълумотларга кўра, хакерлик ҳужумлари фақат Украина билан чекланмаган. Руминияда камида 67 та, Грецияда 27 та электрон почта аккаунти бузилган, шунингдек Болгария ва Сербияда ҳам шунга ўхшаш ҳолатлар қайд этилган.
Мутахассислар таъкидлашича, ушбу ҳодиса Россияга алоқадор кибержосуслик фаолиятининг кенгроқ тизимининг бир қисми бўлиши мумкин.
Россия томони хакерлик фаолиятига алоқадорлик ҳақидаги айбловларни рад этиб келмоқда.
