Тошкентда метро поезди эшиклари очиқ ҳолда ҳаракатланди
Ҳолат юзасидан расмий муносабат билдирилди.
Ижтимоий тармоқларда метро поезди вагони эшиги очиқ ҳолда ҳаракатлангани акс этган видео тарқалди. Мазкур ҳолат бўйича “Тошкент метрополитени” расмий муносабат билдирди.
Маълум қилинишича, 14 апрель куни соат тахминан 12:53 да “Алишер Навоий” метро бекатидан ҳаракатланиши режалаштирилган 34-сонли ҳаракат таркибида йўловчилар қабул қилингандан сўнг машинист Ш.А. Абилкасимов томонидан эшикларни ёпиш буйруғи берилганига қарамасдан, учинчи вагоннинг биринчи эшиги тўлиқ ёпилмаган.
Шунга қарамай, машинист “Ўзбекистон” метро бекати томон ҳаракатни давом эттирган. Ҳаракат хавфсизлигини таъминлаш мақсадида поезд бекатда тўхтатилиб, йўловчилар туширилган ҳамда ҳаракат таркиби техник кўрик йўлагига олиб кетилган.
Ҳолат юзасидан хизмат текшируви ўтказилиб, машинист Ш.А. Абилкасимовга нисбатан қатъий интизомий чора кўрилиши белгиланган.
“Тошкент метрополитени” ДУК томонидан йўловчилар хавфсизлигини таъминлаш устувор вазифа ҳисобланашини ва бундай ҳолатларнинг олдини олиш бўйича қўшимча назорат чоралари кучайтирилаётганини таъкидлаб, келтирилган ноқулайликлар учун йўловчилардан узр сўради.
