Алиментдан қарздор жиззахлик ота Тошкентдан топилди
Унинг алимент қарздорлиги 60 млн сўмдан ортиқни ташкил этган бўлса-да, мажбуриятини бажармай келган.
Мажбурий ижро бюросининг Ғаллаорол тумани бўлими томонидан фарзандлар таъминоти учун алимент тўлашдан қасддан бўйин товлаб, давлат ижрочиси ҳузурига келмасдан юрган фуқаро С.А.га нисбатан қидирув эълон қилинган эди.
Бюронинг Жиззах вилояти бошқармаси қидирув шуъбаси ходимлари томонидан ўтказилган тезкор-қидирув тадбирлари давомида ушбу шахс Тошкент шаҳрида ИИБ ходимлари билан ҳамкорликда аниқланди. Маълум бўлишича, у Тошкент шаҳрида фуқаролардан бирининг отларини парваришлаш билан шуғулланиб юрган.
Қидирувда бўлган шахс аниқланиб, кейинги ижро ҳаракатларини амалга ошириш учун Бюронинг Ғаллаорол тумани бўлими давлат ижрочисига топширилган.
Аниқланишича, С.А.нинг алимент бўйича қарзи 60 миллион сўмдан ортиқни ташкил этади.
Ҳозирда қарздорга нисбатан қонунчиликда белгиланган тартибда тегишли ижро ҳаракатлари амалга оширилмоқда.
