Собиқ ИИВ ўринбосари Бекмурод Абдуллаев гаров эвазига озод этилди
У давлатга етказилган 200 млрд сўм зарар тўлиқ қоплангач қамоқ эҳтиёт чораси гаров эвазига ўзгартирилган.
Собиқ Ички ишлар вазири ўринбосари Бекмурод Абдуллаевга нисбатан қўлланган қамоққа олиш тарзидаги эҳтиёт чораси гаров эвазига ўзгартирилди. Бу ҳақда Kun.uz манбалари хабар бермоқда.
Маълумотларга кўра, суд қарори асосида Абдуллаев томонидан давлатга етказилган 200 миллиард сўмдан ортиқ зарар тўлиқ қопланган. Ушбу маблағлар нақд пул шаклида давлат ҳисобига қайтарилгач, унга нисбатан эҳтиёт чораси ўзгартирилиб, гаров қўллашга қарор қилинган.
Бекмурод Абдуллаев илгари Мудофаа вазирлиги, Ички ишлар вазирлиги ҳамда Миллий гвардия тизимларида турли масъул лавозимларда ишлаган. У 2021 йил апрель ойида Ички ишлар вазири ўринбосари лавозимига тайинланган эди.
2025 йил ноябр ойида у лавозимидан озод этилган. 2026 йил январ ойида эса унга нисбатан давлат харидлари тизимидаги молиявий қонунбузилишлар юзасидан жиноят иши қўзғатилиб, қамоққа олиш тарзидаги эҳтиёт чораси қўлланган.
Дастлабки тергов маълумотларига кўра, мазкур иш доирасида вазирлик тизимидаги давлат харидлари жараёнида 186 миллиард сўм миқдоридаги маблағлар талон-торож қилинганлиги юзасидан қамоққа олингани маълум қилинган.
Жазони ижро этиш департаменти собиқ бошлиғи, Абдуллаев билан бир вақтда ишдан олинган Рустам Турсунов қамоқда қолмоқда.
