Таиландда энг катта “сув жанги”да 191 киши ҳалок бўлди

Таиландда ҳар йили нишонланадиган Сонгкран фестивали давомида йўл ҳаракати хавфсизлиги билан боғлиқ вазият кескин ёмонлашиб, сўнгги уч кун ичида 191 киши ҳалок бўлди. Бу ҳақда The New York Post хабар берди.

 

Расмий маълумотларга кўра, ушбу давр мобайнида 951 та йўл-транспорт ҳодисаси қайд этилган бўлиб, 911 киши турли даражада тан жароҳатлари олган. Энг оғир кўрсаткичлардан бири сифатида байрамнинг биринчи кунидаёқ 51 кишининг ҳаётдан кўз юмгани қайд этилди.

 

Мутахассислар таъкидлашича, ҳалокатларнинг асосий сабаблари тезликни ошириш (тахминан 42 фоиз) ва маст ҳолда транспорт воситасини бошқариш (27,4 фоиз) билан боғлиқ. Шунингдек, мотоцикл ҳайдовчилари томонидан ҳимоя шлемларидан фойдаланмаслик ҳам жароҳатлар ва ўлим ҳолатларининг кўпайишига сабаб бўлган.

 

Маълумотларга кўра, йўл-транспорт ҳодисалари энг кўп 15:01 дан 18:00 гача бўлган вақт оралиғида содир бўлган.

 

Расмий статистикалар Таиландни Жаҳон соғлиқни сақлаш ташкилоти аъзолари орасида йўл-транспорт ҳодисалари бўйича энг хавфли давлатлар қаторида, 9-ўринда эканини кўрсатади.

 

Сонгкран фестивали Таиланд Янги йили сифатида нишонланади ва одатда миллионлаб одамларнинг ўз туғилган вилоятларига сафар қилиши билан кечади. Байрам “дунёдаги энг катта сув жанги” сифатида ҳам машҳур бўлиб, кўчаларда оммавий сув сепиш анъанаси билан ўтказилади. Бироқ айни шу даврда йўлларда тирбандлик ва хавфли ҳаракатлар кескин ортади.

 

Расмийлар томонидан “етти хавфли кун” деб аталадиган ушбу даврда тезликни ошириш, маст ҳолда ҳайдаш ва хавфсизлик қоидаларига риоя қилмаслик энг кўп учрайдиган омиллар сифатида қайд этилади.

 

Шу билан бирга, байрам даврида жамоат тартибини бузиш ҳолатлари ҳам қайд этилган. Хусусан, 12 апрель куни етти нафар франциялик сайёҳ йўл ҳаракатига тўсқинлик қилгани ва жамоат тартибини бузганликда гумон қилиниб қўлга олинган. Расмийлар уларнинг Сонгкран пайтидаги тартибсиз хатти-ҳаракатлари бўйича маъмурий чоралар кўрилганини билдирган.