Андижонда аёл эрига нотўғри укол қилиб, унинг ўлимига сабабчи бўлди

Андижонда эркак нотўғри “укол” оқибатида вафот этди. Zamon.uz суд ҳужжати билан танишди.

 

 

 

 

Суд ҳукмига кўра, 2000 йилда туғилган аёл 2018 йилда туман тиббиёт коллежини аъло баҳоларга битирган. 2023 йилда оила қурган, қариндошлари бетоб бўлганда ўзи укол қилиб келган. 2025 йил 21июн куни унинг турмуш ўртоғи шамоллаб қолгани ва соғаймаётганини айтиб укол қилишни сўраган.

 

“Даволаниш мақсадида “Seftriaksion sulbaktam” номли укол олиб келди. Ундан бу дори воситасини илгари олган ёки олмаганини сўраганимда олганлигини айтди.  Шу сабабли 1 мг антибиотик “Sulbaktam” воситасини турмуш ўртоғимнинг мушаги орасига юбордим, бироз вақтдан сўнг, у ташқарига чиқиб кетиб мазаси бўлмаётганини айтиб мени чақирди. Шу вақтда унинг олдига чиқдим, “103” қисқа рақамига қўнғироқ қилиб навбатчи шифокорга улаб беришини айтдим, лекин улар жавоб бермади”- деган аёл судда.

 

Шундан сўнг, аёл эрининг тили орқага кетаётганини кўрган, қайнакаси уни қошиқ ёрдамида ушлаб турган ҳамда ўзининг машинасида тез тиббий ёрдам бўлимига олиб борган. Аёл ёш боласи борлиги учун уйда қолган. Бироздан кейин қайнакасига қўнғироқ қилиб, эрининг аҳволини сўраганда, у жонлантириш бўлимида вафот этганини билдирган. 

 

Судда марҳумнинг отаси ҳам кўрсатма бериб, ўғли шамоллаб қолгани, 2-3 кун ичида соғаймагани туфайли антибиотик олиб келганини айтди.

 

“21 июн соат 23:10 ларда келиним дори воситасининг таъсирини кўриш учун уни мушак орасига жўнатди, 23:20 ларда ўғлим қизиб кетаётганини айтиб чақирганини эшитдим, унинг олдига чиққанимда,  ҳушсиз ҳолатда ётганлигини кўрдим, яна бир ўғлим билан уни тиббиёт бирлашмасига олиб бордик. Шифокорлар ўғлимни жонлантириш бўлимига олганда, унинг қон босими “0” га тушиб қолганлигини айтишди, у соат 00:30 ларда вафот этди. Ушбу ҳолатда келиним қасддан бундай иш қилмади, антибиотик воситаси акс таъсир қилиши натижасида ўғлим вафот этди, келинимга нисбатан даъвом йўқ, унга енгиллик сўрайман” деган марҳумнинг отаси.

 

Суд тиббий экспертизасининг 2025 йил 20 июл кунги хулосасида “Seftriaksion sulbaktam”ни чап думба соҳасидан инекция қилишда юзага келган анафилактик шок натижасида  марҳумда  ўткир юрак қон-томир ва нафас етишмовчилиги, юрак эпикарди ва ўпка плевраси остида кўплаб нуқтасимон қон қуйилишлар аниқланган.  2026 йил 30 январдаги хулосада эса ўлим  ҳолати инекция қилинган дори воситасининг ножўя таъсири натижасида келиб чиққанлиги кўрсатилган.

 

ЖИБ Жалақудуқ туман суди 2026 йил 2 мартдаги ҳукми билан судланувчи аёлни Жиноят Кодексининг 102-моддасининг 1-қисмида назарда тутилган жиноятларни содир қилганликда айбли деб топди ва 70-моддага асосан уни жазодан озод қилди.

 

Биргина эҳтиётсизлик ортидан жалақудуқлик аёлнинг фарзанди отасиз ўсадиган бўлди. Ҳа, бу ҳаммани юрагини эзади. Лекин бундан хулоса чиқаришимиз, ўзимизни-ўзимиз даволашга уринмаслигимиз керак. Шу ўринда, шифохоналарда нотўғри муолажа оқибатида ўлим ҳолатлари кузатилаётганини ҳам ҳисобга олсак, бу фақат бизнинг эмас, балки тизимнинг муаммосидир.