Пентагон Эронга қарши янги операция бошлади
Бу операция “Эпик ғазаб”нинг кенгайтирилган босқичи экани айтилмоқда.
АҚШ Мудофаа вазирлиги Эрон Ислом Республикасига қарши янги босим чоралари доирасида “Иқтисодий ғазаб” номли операция бошланганини маълум қилди.
АҚШ мудофаа вазири Пет Ҳегсетнининг айтишича, ушбу ташаббус Теҳронга максимал иқтисодий босим ўтказиш орқали уни “тўғри қарор” қабул қилишга ундашга қаратилган. У Вашингтон музокараларни афзал кўришини, бироқ зарурат туғилса, қатъий вариантлар ҳам истисно эмаслигини таъкидлади.
Ҳегсет, шунингдек, АҚШ ҳарбийлари аввал ҳам йирик жанговар операциялардан глобал блокада ва босим тизимига ўтганини, бу тажриба тез ва янада кучли шаклда қайта қўлланиши мумкинлигини қайд этди.
Унинг сўзларига кўра, Президент Доналд Трамп топшириғига биноан Вашингтон Эроннинг ядро қуролига эга бўлишига йўл қўймаслик сиёсатини давом эттиради.
АҚШ Молия вазирлиги ҳам операция доирасида чораларни кучайтиришини билдирди. Скотт Бессентнинг қайд этишича, Вашингтон “Иқтисодий ғазаб” доирасида барча мавжуд иқтисодий воситалардан фойдаланади ва Эронни қўллаб-қувватлаётган тузилмаларга қарши босим янада кучайтирилади. Молия вазирлиги расмийлари бу жараён “максимал иқтисодий босим стратегияси”нинг бир қисми эканини таъкидламоқда.
Расмий маълумотларда операция аввалроқ “Эпик ғазаб” номи билан ҳам тилга олинган ташаббуснинг кенгайтирилган босқичи экани айтилади. АҚШ томони Эронни музокара столига қайтариш учун босим ва дипломатия параллел равишда давом этишини билдирган.
Аввалроқ АҚШ Эрон билан боғлиқ айрим минтақавий чекловларни кучайтиргани, жумладан денгиз йўналишларида назорат ва босим чораларини кенгайтиргани ҳақида ҳам хабарлар тарқалган эди.
Расмийлар ушбу сиёсат Эроннинг минтақавий таъсирини чеклаш ва хавфсизлик таҳдидларига жавоб беришга қаратилганини айтмоқда.
Ҳозирча Эрон томони “Иқтисодий ғазаб” операциясига расмий муносабат билдиргани йўқ.
Таҳлилчиларга кўра, янги босим кампанияси Вашингтон ва Теҳрон ўртасидаги аллақачон кескин бўлган муносабатларни янада мураккаблаштириши мумкин.
