Тошкентда 77 та жаримаси бор Matiz хатланди
Маълум бўлишича, ҳайдовчининг жарималари 40 млн сўмга етган.
Мажбурий ижро бюросининг Тошкент шаҳар бошқармаси иш юритувига Тошкент шаҳар ИИББ ЙҲХБ қарорларига асосан қарздор фуқаро Ф.А.га нисбатан 77 та ижро ҳужжатлари келиб тушди. Унга кўра, унинг маъмурий жарималар бўйича қарзи қарийб 40 миллион сўмга етган.
Оддий бир ҳолат: фуқаро ўзининг “Matiz” автомашинасида йўлга чиқиб, йўл ҳаракатлари қоидаларини бузиб келиб, “ҳеч нарса бўлмайди” деган бепарволик 17 ой давомида давом этган.
Натижада эса 77 марта қоидабузарлик қайд этилган. Ҳар бир жарима алоҳида-алоҳида катта эмасдек туюлиши мумкин, лекин улар йиғилиб бориб, охирида қарийб 40 миллион сўмлик қарзга айланган.
Энг ачинарлиси, қарздор бу жарималарни ўз вақтида тўлаш ўрнига, масалани чўзиб юрган. Оқибатда унинг автомашинаси қидирувга берилди. Қидирув ишлари натижасида эса ушбу “Matiz” жарима майдонидан топилди.
Шундан сўнг давлат ижрочиси томонидан қонуний чоралар кўрилиб, автоулов хатланди.
