Эрон ҳаво ҳудуди фуқаролик рейслари учун қисман очилди
Мамлакатнинг шарқий қисми парвозлар учун очилган, ғарбий ҳудудлар эса ёпиқ қолмоқда.
Эрон февраль ойи охиридан буён илк бор мамлакат ҳаво ҳудудининг бир қисмини халқаро фуқаролик рейслари учун қайта очди. Бу ҳақда Al Arabia Фуқаро авиацияси ташкилоти вакилларига таяниб хабар бермоқда.
Маълум қилинишича, мамлакатнинг шарқий қисмидаги ҳаво ҳудуди халқаро қатновлар учун очилган бўлса, ғарбий ҳудудлар ҳозирча ёпиқ ҳолда қолмоқда.
Шунингдек, Теҳрондаги аэропортлар яқин кунларда чекланган режимда фаолият юритиб, кунига маълум вақт оралиғида самолётларни қабул қилиш ва жўнатишни амалга ошириши кутилмоқда.
Расмий манбаларга кўра, парвозлар хавфсизлигини таъминлаш мақсадида бир қатор қўшимча талаблар жорий этилган. Жумладан, самолётлар Эрон ҳаво ҳудудига киришдан аввал олдиндан аниқланиши ҳамда қўшни давлатлар диспечерлик хизматлари билан мувофиқлаштирилган алоқа ўрнатиши лозим.
Фуқаролик авиацияси ташкилоти мамлакат бўйлаб аэропортларда қатновлар ҳарбий ва фуқаролик тузилмалари техник ҳамда операцион тайёргарлигидан келиб чиқиб босқичма-босқич тикланишини маълум қилди.
