Эрон Ҳормуз бўғозини яна ёпди
АҚШ Эрон портларига нисбатан босим чораларини сақлаб қолган.
Эрон расмийлари Ҳормуз бўғози яна мамлакат қуролли кучларининг қатъий назорати остига олинганини маълум қилди.
Associated Press агентлиги хабарига кўра, Эрон Бирлашган кучлар қўмондонлиги АҚШ томонидан Эрон портларига нисбатан блокада давом этаётган шароитда Ҳормуз бўғози орқали юк ташиш ҳаракатларига чекловлар қўйилиши мумкинлигидан огоҳлантирган.
Баёнотда таъкидланишича, агар Қўшма Штатлар Эрон портларига босим сиёсатини давом эттирса, бўғоз орқали халқаро транзит ҳаракатига тўсқинлик қилиниши эҳтимоли мавжуд.
Аввалроқ АҚШ президенти Доналд Трамп Эрон портларига нисбатан блокада сақланиб қолишини ва бу чоралар Теҳроннинг ядровий дастури бўйича келишувга эришилгунга қадар давом этишини билдирган эди.
17 апрель куни Эрон Ҳормуз бўғозини тижорат кемалари учун очаётганини маълум қилган эди. Ўша пайтда расмий Теҳрон бу қарорни минтақадаги сулҳ жараёнлари билан изоҳлаган ва бўғоз сулҳ давомида очиқ бўлишини билдирган.
Ҳормуз бўғози глобал нефть етказиб бериш йўналишларининг энг муҳим стратегик нуқталаридан бири ҳисобланади. Шу боис ундаги ҳар қандай чеклов халқаро энергетика бозорларига сезиларли таъсир кўрсатиши мумкин.
