Тошкентда йўлларни таъмирлаш учун 14 миллиард сўм ажратилади

Тошкент шаҳрида йўл инфратузилмасини яхшилаш мақсадида 14 миллиард сўм маблағ ажратилади. Бу ҳақда пойтахт ҳокими Шавкат Умрзоқовнинг 17 апрель кунги қарорида белгиланган.

 

Қарорга кўра, маблағлар ҳокимлик ҳузуридаги шаҳарни ривожлантириш жамғармаси ҳисобидан молиялаштирилади. Улар марказий кўчаларни сақлаш ва таъмирлашга ихтисослашган бошқарма ҳамда туман ободонлаштириш бошқармалари орқали йўналтирилади.

 

Ажратилган маблағлар пойтахтнинг барча туманлари ўртасида тенг тақсимланади. Жумладан, Бектемир, Миробод, Мирзо Улуғбек, Сергели, Олмазор, Шайхонтоҳур, Яшнобод, Чилонзор, Учтепа, Юнусобод, Яккасарой ва Янгиҳаёт туманларининг ҳар бирига 1 миллиард сўмдан ажратилиши режалаштирилган. Бундан ташқари, марказий кўчаларни сақлаш ва таъмирлашга ихтисослашган бошқарма учун қўшимча 2 миллиард сўм йўналтирилади.

 

Ҳужжатда ажратилган маблағларнинг мақсадли сарфланишини таъминлаш ҳамда бажарилган ишлар юзасидан Халқ депутатлари Тошкент шаҳар кенгаши ва ҳокимликка мунтазам ҳисобот бериб бориш белгиланган. Молиялаштириш ва назорат ишлари тегишли идоралар зиммасига юклатилган.

 

Қарор ижроси устидан назорат пойтахт ҳокимининг биринчи ўринбосари Бахтиёр Раҳмонов зиммасига юклатилган.