Маданият ва санъат соҳаси бўйича 20–25 апрель кунлари очиқ мулоқотлар ўтказилади
Учрашувларда муаммолар, таклифлар ва янги ғоялар муҳокама қилинади.
Ўзбекистон Президентининг топшириғига асосан, мамлакатда маданият ва санъат соҳасини тубдан ислоҳ қилиш, мавжуд муаммоларни бартараф этиш ҳамда янги ташаббусларни қўллаб-қувватлаш мақсадида очиқ мулоқот ва учрашувлар мавсуми бошланмоқда.
Мазкур учрашувлар Президент Администрацияси вакиллари, Маданият вазири Озодбек Назарбеков ҳамда тегишли вазирлик ва идоралар раҳбарлари иштирокида 2026 йил 20–25 апрель кунлари тасдиқланган жадвал асосида ўтказилади.
Очиқ мулоқотлар кино ва анимация, театр ва цирк, эстрада, рақс, адабиёт, блогерлик, музейлар, археология, тасвирий ва амалий санъат, маданият таълими, болалар контенти ҳамда бошқа муҳим йўналишларни қамраб олади.
Учрашувлар давомида соҳадаги мавжуд муаммолар очиқ муҳокама қилинади, амалий таклиф ва ташаббуслар қабул қилинади, маданият ва санъатни ривожлантиришга қаратилган янги ғоялар кўриб чиқилади.
Энг долзарб ва амалий аҳамиятга эга таклифлар муаллифлари давлат раҳбари иштирокида ўтказиладиган йиғилишга таклиф этилади.
Ташкилотчилар барча ижодкорлар, мутахассислар, тадбиркорлар ҳамда ташаббускор ёшларни фаол иштирок этишга чақирди. Иштирок этиш учун олдиндан махсус бот (@mv_ochiqmuloqot_bot) орқали рўйхатдан ўтиш талаб этилади.
