АҚШ Ҳормуз бўғози яқинида Эрон кемасини қўлга олди

АҚШ президенти Доналд Трамп Ҳормуз бўғози яқинида Эрон байроғи остидаги юк кемаси қўлга олинганини маълум қилди. 

 

Расмий Вашингтонга кўра, кема АҚШ томонидан жорий этилган денгиз блокадасини бузиб ўтишга уринган.

 

Трампнинг билдиришича, "Тоуска" номли кема Уммон қўлтиғида АҚШ Ҳарбий-денгиз кучлари эсминеци томонидан тўхташга чақирилган, бироқ экипаж буйруққа бўйсунмаган. Шундан сўнг кема двигатель қисми зарарланган ва АҚШ денгиз пиёдалари томонидан назоратга олинган. Ҳозирда кема борти текширилмоқда.

 

АҚШ Марказий қўмондонлиги маълумотига кўра, кема Эроннинг Бандар-Аббос портига йўл олган бўлиб, олти соат давомида берилган огоҳлантиришларга амал қилмаган.

 

Эрон томони эса воқеани кескин қоралади. Мамлакатнинг олий ҳарбий қўмондонлиги АҚШни аввал эришилган сулҳни бузишда айблаб, бу ҳаракатни “қуролли денгиз босқинчилиги” деб атади. Хотам ал-Анбия қўмондонлиги вакилига кўра, Теҳрон яқин орада жавоб чораларини кўради.

 

Мазкур ҳодиса Ҳормуз бўғози атрофидаги кескин вазият фонида юз бермоқда. Ушбу ҳудуд орқали дунё нефтининг қарийб бешдан бир қисми ташилади. 

 

АҚШ 13 апрелдан буён Эрон портларига йўналган кемаларга нисбатан блокада жорий қилган.

 

Эрон парламенти спикери Муҳаммад Бағер Ғолибаф блокада бекор қилинмагунча бўғоз орқали эркин ҳаракат бўлмаслигини таъкидлади.

 

Аввалроқ Эрон Ливандаги Ҳизбуллоҳ билан боғлиқ ҳудуддаги 10 кунлик сулҳ фонида бўғоз қайта очилганини билдирган эди. Бироқ АҚШ блокадаси сақланиб қолаётгани сабабли чекловлар давом этмоқда.

 

Шу билан бирга, АҚШ музокарачиларининг Исломободда Эрон билан эҳтимолий музокаралар ўтказиши кутилмоқда. Бу эса қисқа муддатли сулҳни узайтириш эҳтимолини оширганди. Бироқ Эрон давлат ОАВлари Теҳрон музокараларнинг навбатдаги босқичига ҳали розилик бермаганини ёзмоқда.