“Президентнинг мурожаатини етказиш мен учун катта шараф бўлди” — Саида Мирзиёева
Самарқандда наркотаҳдидларга қарши ўтказилаётган форумда халқаро ташкилотлар раҳбарлари “Наркотикларга қарши курашиш фидойиси” кўкрак нишони билан тақдирланди.
Бугун Самарқанд шаҳрида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги халқаро форум ўз ишини бошлади.
Мазкур форумда Президент администрацияси раҳбари Саида Мирзиёева Ўзбекистон Президентининг иштирокчиларга йўллаган мурожаатини ўқиб эшиттирди.
“Форум иштирокчиларига — 50 дан ортиқ давлат вакиллари, 500 дан зиёд халқаро эксперт ва мутахассислар, шунингдек, БМТ, Интерпол, Европа Иттифоқи, МДҲ ва ШҲТ каби етакчи халқаро ташкилотлар делегатларига Ўзбекистон Республикаси Президенти Шавкат Мирзиёевнинг мурожаатини етказиш мен учун катта шараф бўлди”, дея ёзди Саида Мирзиёева.
Маълум қилинишича, ушбу соҳадаги ҳамкорликни ривожлантиришга қўшган ҳиссаси учун қатор халқаро ташкилотлар раҳбарлари махсус таъсис этилган “Наркотикларга қарши курашиш фидойиси” кўкрак нишони билан тақдирланди.
