Самарқанд форумида наркотаҳдидларга қарши замонавий технологиялар намойиш этилди
Наркотрафик ва трансмиллий жиноятчиликни кузатиш учун ягона сунъий интеллект платформасини яратиш ташаббуси илгари сурилди.
Бугун Самарқанд шаҳрида бутун жаҳон ҳамжамияти учун энг долзарб мавзулардан бири — “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги халқаро форум ўз ишини бошлади.
Тадбирда 50 дан ортиқ давлат вакиллари, 500 дан зиёд халқаро эксперт ва мутахассислар, шунингдек БМТ, Интерпол, Европа Иттифоқи, МДҲ ва ШҲТ каби етакчи халқаро ташкилотлар делегациялари иштирок этмоқда.
Форум доирасида ташкил этилган кўргазма билан ҳам танишилди. Унда уюшган наркожиноятчиликка қарши курашишда қўлланилаётган замонавий рақамли технологиялар, илғор техник воситалар ҳамда махсус ускуналар намойиш этилди.
Шунингдек, Ўзбекистон томонидан иштирокчи давлатлар учун наркотрафик, хавфли юклар ва трансмиллий жиноятчиликни реал вақт режимида кузатиб бориш имконини берувчи ягона сунъий интеллект платформасини яратиш ташаббуси илгари сурилди.
