Россия Ўзбекистонга илк миллий космонавтни тайёрлашда ёрдам беради
Россия Ҳукумати Ўзбекистоннинг космик соҳадаги режаларини қўллаб-қувватлашини ва бу йўналишда ўз тажрибасини тақдим этишга тайёр эканини маълум қилди.
Россия Ўзбекистоннинг биринчи миллий космонавтини тайёрлаш, уни Ер орбитасига юбориш ҳамда мамлакатнинг илк сунъий йўлдошини космосга учириш бўйича ҳамкорлик қилишга тайёрлигини билдирди.
Бу ҳақда Россия Федерацияси Ҳукумати Раисининг биринчи ўринбосари Денис Мантуров журналистларга берган баёнотида маълум қилди дейди ТАСС.
Унинг таъкидлашича, Президент Шавкат Мирзиёев томонидан ўтган йил охирида биринчи миллий космонавтни тайёрлаш, уни паст Ер орбитасига юбориш ва илк сунъий йўлдошни учириш бўйича йирик мақсадлар белгиланган.
Денис Мантуров Ўзбекистон Россиянинг стратегик ҳамкори эканини қайд этиб, ушбу режаларни Москва томони олқишлаши ҳамда уларни амалга оширишда мавжуд тажриба ва илмий-техник салоҳиятни сафарбар этишга тайёр эканини таъкидлаган.
Шунингдек, у Россия ҳозирда МДҲ, Осиё, Африка ва Яқин Шарқнинг бир қатор давлатлари билан космонавтларни бошқариладиган парвозларга тайёрлаш, алоқа йўлдошлари ҳамда Ерни масофадан зондлаш технологияларини ишлаб чиқиш бўйича музокаралар олиб бораётганини маълум қилган.
