Ўзбекистонда мобил рақамни бошқа шахс номига ўтказиш соддалаштирилди
Янги хизмат орқали фойдаланувчилар рақамни онлайн тарзда бошқа шахсга ўтказиши мумкин.
Ўзбекистонда мобил телефон рақамини бошқа шахс номига ўтказиш бўйича янги онлайн хизмат ишга туширилди. Эндиликда фойдаланувчилар СИМ-карта эгасини алмаштириш учун мобил оператор офисларига шахсан ташриф буюриши шарт эмас.
Мазкур хизмат орқали бутун жараён my.gov.uz Ягона интерактив давлат хизматлари портали ҳамда MyGov мобил иловаси орқали масофадан туриб электрон шаклда амалга оширилади.
Аввал мобил рақам эгасини ўзгартириш учун амалдаги абонент ва янги фойдаланувчи оператор офисига биргаликда бориши, ҳужжатларни расмийлаштириши ва навбат кутиши талаб этилар эди. Эндиликда ушбу хизмат тўлиқ рақамлаштирилди.
Хизматдан фойдаланиш учун фойдаланувчилар my.gov.uz портали ёки MyGov мобил иловасига кириб, “Мобил рақам ўтказиш” хизматини танлаши ҳамда аризани электрон тарзда тўлдириши лозим.
Шунингдек, транзакцияни якунлаш учун амалдаги ва янги эгалар томонидан MyID идентификация тизими орқали тасдиқлаш талаб этилади.
Маълум қилинишича, янги хизмат барча мобил алоқа операторларида босқичма-босқич жорий этилмоқда. Ҳозирда ушбу имконият Beeline, Mobiuz ва Uztelecom абонентлари учун мавжуд.
Хизмат нархи мобил операторларнинг ички тариф сиёсатига мувофиқ белгиланади. Айрим операторларда эса яқин қариндошлар ўртасида рақамни ўтказиш бепул амалга оширилмоқда.
