Миллий кино санъати саройи атрофидаги реклама баннерлари олиб ташланди

Навоий кўчаси, 15-уйда жойлашган Алишер Навоий номидаги Миллий санъат саройи (Панорама) ҳудудида рухсатсиз ўрнатилган реклама баннерлари аниқланиб, улар шу куннинг ўзида олиб ташланган. Бу ҳақда Маданий мерос агентлиги маълум қилди.

 

Қайд этилишича, 21 апрель куни Агентлик директорининг биринчи ўринбосари Элмурод Нажимов бошчилигидаги ишчи гуруҳ томонидан пойтахтдаги 28 та маданий мерос объекти ўрганиб чиқилган.

 

Мониторинг натижаларига кўра, айрим объектларда тарихий ва меъморий қиёфага нисбатан эътиборсизлик ҳолатлари аниқланган. Хусусан, 3 та объект фасад қисми ташқи омиллар таъсирида ифлосланган, 4 та объект бўйича эса белгиланган тартибга зид равишда рухсатсиз таъмирлаш ишлари олиб борилгани, реклама баннерлари ўрнатилгани ва фасадга ўзбошимчалик билан ўзгартиришлар киритилгани маълум бўлган.

 

Шайхонтоҳур туманидаги Навоий кўчаси, 12-уй манзилида жойлашган Дин ишлари бўйича қўмита биноси юзасидан алоҳида ўрганиш олиб борилган. Унда бино фасадининг ранг ечими кўча бўйича шаклланган меъморий концепцияга мос келмаслиги аниқланган. 

 

Шунингдек, 8 апрель куни берилган муҳофаза белгиси ҳануз ўрнатилмагани қайд этилган. Масъулларга фасадни тарихий қиёфани сақлаган ҳолда қайта тиклаш ва меъёрий талабларга мослаштириш бўйича кўрсатмалар берилган.

 

Бундан ташқари, Навоий кўчаси, 28-уйдаги Марказий телеграф биноси ҳудудида рухсатсиз ер қазиш ишлари олиб борилгани аниқланиб, мазкур ишлар зудлик билан тўхтатилган ва ҳудудни аввалги ҳолатига қайтариш бўйича топшириқлар берилган.

 

Шунингдек, Навоий кўчаси, 30-уйда жойлашган ОАВ учун контент тайёрлаш маркази биносида рухсатсиз таъмирлаш ишлари олиб борилаётгани аниқланиб, мазкур ҳолат юзасидан ҳуқуқий чоралар кўриш жараёни бошланган.

 

Навоий кўчаси, 38-уйдаги “Ўзкимёсаноат” биносида эса рухсатсиз ўрнатилган кондиционер қурилмалари аниқланиб, уларни олиб ташлаш ёки меъёрларга мос равишда жойлаштириш бўйича топшириқлар берилган.

 

Агентлик маълум қилишича, мониторинг давомида аниқланган барча ҳолатларга қонунчилик асосида ҳуқуқий баҳо берилади. Маданий мерос объектларига зарар етказиш ёки уларнинг тарихий қиёфасини бузишга нисбатан қатъий чоралар кўрилиши таъкидланган.

 

Аввалроқ, “Халқлар дўстлиги” санъат саройи атрофидаги рухсатсиз ўрнатилган реклама баннерлари ҳам олиб ташлангани ҳақида хабар берилганди.