Оила ва хотин-қизлар қўмитаси ҳамда Журналистлар уюшмаси ўртасида ҳамкорлик меморандуми имзоланди

 

2026 йил 22 апрель куни Тошкент шаҳрида Ўзбекистон Республикаси Оила ва хотин-қизлар қўмитаси ҳамда Ўзбекистон Журналистлар уюшмаси ўртасида ҳамкорликни янада ривожлантиришга қаратилган меморандум имзоланди.

 

Мазкур ҳужжат Оила ва хотин-қизлар қўмитаси раиси Зулайхо Маҳкамова ҳамда Ўзбекистон Журналистлар уюшмаси раиси вазифасини бажарувчи Шуҳрат Орипов ўртасидаги учрашув якунида расмийлаштирилди.

 

Мулоқот давомида оила институтини мустаҳкамлаш, хотин-қизларнинг ҳуқуқ ва қонуний манфаатларини ҳимоя қилиш, уларнинг жамиятдаги фаоллигини ошириш, шунингдек, аёллар ва болаларга нисбатан зўравонликнинг олдини олиш борасида амалга оширилаётган ислоҳотларни оммавий ахборот воситалари орқали кенг ёритиш масалалари муҳокама қилинди.

 

Меморандумга мувофиқ, Ўзбекистон Журналистлар уюшмаси ўз аъзоларини жалб қилган ҳолда оила ва хотин-қизлар соҳасидаги давлат сиёсати, мазкур йўналишда олиб борилаётган ислоҳотлар ҳамда ижтимоий ташаббусларни оммавий ахборот воситаларида кенг тарғиб этишда фаол иштирок этади.

 

Томонлар ҳамкорлик доирасида бир қатор йўналишларда қўшма ишларни амалга оширади. Жумладан, мамлакатимизда оила институтини мустаҳкамлаш, хотин-қизларнинг жамиятдаги ўрни ва фаоллигини оширишга қаратилган ташаббусларни халқаро майдонда тарғиб қилиш, хорижий аудиторияга мўлжалланган журналистик материаллар тайёрлаш, “Олтин қалам”, «Атиргул» каби кўрик-танловлар орқали, шунингдек, ижодий лойиҳалар ва медиа ташаббусларни йўлга қўйиш энг яхши журналистик материалларни аниқлаш, уларни рағбатлантириш режалаштирилган.

 

Шунингдек, журналистлар учун медиатурлар, матбуот анжуманлари ва брифингларда иштирок этиш имкониятларини кенгайтириш, қўмита тизими ходимлари ҳамда хотин-қизлар фаолларининг ОАВ билан ишлаш кўникмаларини ошириш бўйича семинар-тренинглар ўтказиш ҳам назарда тутилган.

 

Бундан ташқари, ижтимоий тармоқларда фаол журналист ва блогерларни рағбатлантириш, қўмита ахборот хизматига рақамли коммуникациялар бўйича методик ёрдам кўрсатиш, соҳа фахрийларини эъзозлашга қаратилган тадбирларни ташкил этиш юзасидан ҳам ўзаро ҳамкорлик йўлга қўйилади.

 

Мазкур меморандум оила ва хотин-қизлар масалаларини кенг жамоатчиликка етказиш, жамиятда соғлом муҳитни мустаҳкамлаш ҳамда медиа соҳасида самарали ҳамкорликни ривожлантиришга хизмат қилиши таъкидланди.