Ўзбекистон аэропортлари уч ойда қарийб 4 миллион йўловчига хизмат кўрсатди

 

Uzbekistan Airports 2026 йилнинг январ–март ойларидаги фаолият якунларини эълон қилди. Ҳисобот даврида мамлакат аэропортларида йўловчи ташиш, рейслар сони ҳамда юк айланмаси бўйича барқарор ўсиш қайд этилди.

 

Жорий йилнинг дастлабки уч ойида республика аэропортлари орқали жами 30 859 та рейс амалга оширилган. Бу кўрсаткич ўтган йилнинг мос даврига нисбатан 10 фоизга юқори. Шундан 22 885 таси халқаро, 7 974 таси ички рейслар ҳиссасига тўғри келади.

 

Мазкур даврда умумий йўловчилар оқими 3 миллион 987 минг 313 нафарни ташкил этди. Уларнинг 3,32 миллион нафари халқаро, 663,5 минг нафари эса ички йўналишларда сафар қилган. Бу эса 2025 йилнинг биринчи чорагига нисбатан 19 фоизлик ўсишни англатади.

 

Мамлакатнинг энг йирик авиация маркази сифатида Тошкент халқаро аэропорти етакчиликни сақлаб қолмоқда. Ушбу аэропорт орқали 2,56 миллион йўловчи қатнови амалга оширилган ҳамда қарийб 19 минг рейсга хизмат кўрсатилган.

 

Минтақавий аэропортлар орасида йўловчилар сони бўйича қуйидаги кўрсаткичлар қайд этилди:

• Самарқанд — 376,4 минг йўловчи
• Урганч — 222 минг йўловчи
• Наманган — 210,1 минг йўловчи
• Фарғона — 161,2 минг йўловчи

 

Шунингдек, юк ташиш сегментида ҳам ижобий ўсиш кузатилди. Биринчи чорак давомида аэропортлар орқали 19 783 тонна юк ва почта ташилган бўлиб, бу ўтган йилга нисбатан 14 фоизга кўпдир.

 

Мазкур натижалар Ўзбекистон авиация тармоғининг изчил ривожланаётгани, халқаро йўналишлар тармоғининг кенгаяётгани ва мамлакат ичидаги ҳаракатланишнинг босқичма-босқич ошиб бораётганини тасдиқлайди.