Ўзбекистонда қалбаки алкоголь ва тамаки маҳсулотлари хавфи ҳақида огоҳлантириш берилди
Ҳудудларда яроқлилик муддати ўтган, қалбаки алкоголь ва тамаки маҳсулотларини ноқонуний муомалага киритиш ҳолатлари аниқланмоқда.
Алкоголь ва тамаки бозорини тартибга солиш инспекцияси аҳоли ва тадбиркорларни сифатсиз ҳамда саломатлик учун хавфли маҳсулотлардан эҳтиёт бўлишга чақирди.
Маълум қилинишича, оммавий ахборот воситалари ва ижтимоий тармоқларда бу борада бир неча бор огоҳлантиришлар берилишига қарамай, ҳудудларда яроқлилик муддати ўтган, шунингдек, қалбаки алкоголь ва тамаки маҳсулотларини ноқонуний муомалага киритиш ҳолатлари ҳали ҳам учраб турибди.
Инспекция бундай маҳсулотларни аниқлашда қатор муҳим жиҳатларга эътибор қаратиш зарурлигини таъкидламоқда. Хусусан, харид вақтида маҳсулотда акциз маркаси мавжудлиги, рақамли маркировка бор-йўқлиги, яроқлилик муддати ҳамда ишлаб чиқарилган сана (кун, ой, йил) кўрсатилганига алоҳида аҳамият бериш лозим.
Шунингдек, маҳсулотларда 21 ёшга тўлмаган шахсларга истеъмол қилиш тақиқлангани ҳақидаги ёзувлар ва тиббий огоҳлантириш белгилари аниқ ҳамда равшан бўлиши шарт.
Идора фуқаролардан шубҳали ҳолатларга дуч келганда Инспекциянинг ишонч рақами — 71 202 86 90 орқали мурожаат қилишни сўради.
Таъкидланишича, бундай ҳолатларга бефарқ бўлмаслик аҳоли саломатлигини муҳофаза қилиш, шунингдек, ноқонуний ишлаб чиқариш ва яширин иқтисодиётга қарши курашишда муҳим аҳамият касб этади.
