Ўзбекистонда алкоголь маҳсулотлари яна нақд пулда сотилади

Яқин кунларда умумий овқатланиш корхоналарида алкоголь маҳсулотларини нақд пул шаклида ҳам сотиб олиш имконияти қайта йўлга қўйилиши кутилмоқда. Бу ҳақда 21 апрель куни Ўзбекистон Савдо-саноат палатасида ўтказилган очиқ мулоқотда Солиқ қўмитаси раиси Фаррух Пўлатов маълум қилди.

 

Очиқ мулоқотдан олинган видеолавҳада тадбиркорлар алкоголь маҳсулотларини сотишда хорижлик мижозлар билан боғлиқ айрим муаммолар юзага келаётганини билдирган.

 

Шундан сўнг, Солиқ қўмитаси раҳбари бу масала бўйича ишлар олиб борилаётганини, яқин кунларда муаммо ҳал этилишини таъкидлаган.

 

“Бу бизнинг айбимиз. Бу бўйича ишлаяпмиз, яқин кунларда ечим берамиз. Албатта, буни тўғрилаб берамиз”, — деган Фаррух Пўлатов.

 

Унинг қўшимча қилишича, тегишли тартибга ўзгартириш ва қўшимчалар киритиш бўйича ҳужжат лойиҳаси ишлаб чиқилган бўлиб, ҳозирда манфаатдор идоралар билан келишув жараёни давом этмоқда.

 

Шунингдек, учрашувда мамлакатга ташриф буюраётган туристлар учун қулай шароит яратиш мақсадида меҳмонхоналарда туристлик йиғимни нақд пул шаклида ҳам қабул қилиш имконияти йўлга қўйилгани қайд этилди.

 

Маълумотларга кўра, ушбу масала Савдо-саноат палатаси томонидан солиқ маслаҳатчилари, аудиторлар ва бухгалтерлар иштирокидаги очиқ мулоқотда ҳам муҳокама қилинган.

 

Президент Шавкат Мирзиёев томонидан 2025 йил 10 декабрда имзоланган “Нақд пулсиз ҳисоб-китобларни оммалаштириш ва яширин иқтисодиёт улушини қисқартиришга қаратилган қўшимча чора-тадбирлар тўғрисида”ги фармон 2026 йил 1 апрелдан кучга кирган.

 

Унга кўра, айрим товар ва хизматлар учун тўловлар фақат банк карталари ёки электрон тўлов тизимлари орқали амалга оширилиши белгиланган. Жумладан:

 

• давлат хизматлари;

 

• электр энергияси, табиий газ ва ичимлик суви тўловлари;

 

• алкоголь ва тамаки маҳсулотлари;

 

• ёқилғи қуйиш шохобчалари орқали нефть-газ маҳсулотлари ва электр транспортларини қувватлаш хизматлари;

 

• қиймати 25 млн сўмдан юқори бўлган товар ва хизматлар;

 

• кўчмас мулк ҳамда айрим транспорт воситаларининг олди-сотдиси.