Бухорода йўл ҳаракати қоидаларини бузган ҳайдовчи 10 суткага қамалди
Ижтимоий тармоқларда тарқалган видео ўрганилиб, қоидабузар ҳайдовчига нисбатан чора кўрилди.
Ижтимоий тармоқларда тарқалган видео юзасидан Бухоро вилояти Ички ишлар бошқармаси ЖХХ Йўл ҳаракати хавфсизлиги бошқармаси ходимлари томонидан ўрганиш ишлари олиб борилди.
Мазкур видеотасвирда акс этган ҳолат фуқароларнинг кенг муҳокамасига сабаб бўлган. Ўрганишлар натижасида қоидаларни бузган ҳайдовчининг шахси аниқланиб, унга нисбатан қонунчиликда белгиланган тартибда чоралар кўрилди.
Қоидабузар ҳайдовчининг транспорт воситаси вақтинча жарима майдонига жойлаштирилди. Унга нисбатан Ўзбекистон Республикаси Маъмурий жавобгарлик тўғрисидаги кодекснинг 128⁵-моддаси ҳамда 183-моддаси асосида маъмурий баённомалар расмийлаштирилди.
Мазкур иш материаллари Бухоро шаҳар жиноят ишлари бўйича судида кўриб чиқилди. Суд қарорига кўра, ҳайдовчига 128⁵-модданинг иккинчи қисми бўйича базавий ҳисоблаш миқдорининг 10 баравари миқдорида (4 120 000 сўм) жарима жазоси тайинланди.
Шунингдек, 183-модда бўйича 10 сутка маъмурий қамоқ жазоси белгиланди. Якуний қарорга кўра, Маъмурий жавобгарлик тўғрисидаги кодекснинг 34-моддасига мувофиқ 10 сутка маъмурий қамоқ жазоси узил-кесил тайинланди.
