“Кимёвий профилактика тадбирлари амалга оширилмоқда”
Санепидқўмита болалар орасида менингит касаллиги авж олгани ҳақидаги хабарларга муносабат билдирди.
2026 йилда Ўзбекистонда аҳоли орасида менингококк инфекцияси билан боғлиқ ҳолатлар ортгани муносабати билан касаллик тарқалишининг олдини олиш бўйича қўшимча чоралар кўрилмоқда. Бу ҳақда Санепидқўмита ахборот хизмати хабар берди.
Маълум қилинишича, болалар орасида ушбу инфекция кенг тарқалишини олдини олиш мақсадида 8024 доза вакцина харид қилиниб, беморлар билан мулоқотда бўлган 4862 нафар фуқаролар эмлаш билан қамраб олинди. Вакцина билан эмлашга тиббий монелиги бўлган беморлар билан мулоқотда фуқаролар шифокорлар назоратида кимёвий профилактика тадбирлари амалга оширилмоқда.
Ўзбекистонда 2026 йилнинг 1-чорагида 174 та менингококк ҳолати рўйхатга олинган бўлиб шундан 168 нафари 14 ёшгача бўлган болаларни ташкил қилмоқда. Касаллик динамикасига кўра, апрель ойида март ойига нисбатан 14 фоизга камайганлиги кузатилмоқда.
Менингит — бу бош ва орқа мия пардаларининг яллиғланиши бўлиб, кўпинча бактерия ёки вируслар сабабли юзага келади ва тез ривожланиши билан хавфлидир.
Профилактика чораси сифатида аҳолига ўз вақтида эмланиш, шахсий гигиена қоидаларига риоя қилиш, касаллик аломатлари кузатилганда дарҳол шифокорга мурожаат қилиш ҳамда жамоат жойларида эҳтиёт чораларини кўриш тавсия этилмоқда.
Шунингдек, “Ҳаж” ва “Умра” зиёратига бораётган фуқароларга сафар олдидан менингококк инфекциясига қарши эмланиш, сафардан қайтгандан сўнг эса оммавий тадбирларда иштирок этишни вақтинча чеклаш тавсия қилинган.
