Президент Шавкат Мирзиёев Боғимайдон маҳалласидаги бунёдкорлик ишлари билан танишди

Ўзбекистон Президенти Шавкат Мирзиёев Мирзо Улуғбек туманидаги Боғимайдон маҳалласида амалга оширилган бунёдкорлик ва ободонлаштириш ишлари билан танишди.

 

Мамлакатимизда маҳаллалар инфратузилмасини замонавий асосда ривожлантириш, аҳолига қулай ва муносиб яшаш шароитларини яратиш ҳамда “Янги Ўзбекистон” қиёфасини жойларда кенг татбиқ этиш устувор йўналишлардан бири сифатида белгиланган.

 

2026 йил 16 февралда қабул қилинган “Маҳаллани ривожлантириш ва жамиятни юксалтириш” йили Давлат дастури доирасида амалга оширилаётган ишлар маҳаллаларни комплекс ривожлантиришда муҳим дастуриламал бўлиб хизмат қилмоқда.

 

Тошкент шаҳрининг Мирзо Улуғбек туманида жойлашган Боғимайдон маҳалласи бугунги кунда олиб борилган кенг кўламли бунёдкорлик ишлари натижасида замонавий ва обод ҳудудга айланган. 1987 йилда ташкил этилган ушбу маҳаллада 41 та кўп қаватли уй, 1 990 та хонадон мавжуд бўлиб, қарийб 5,5 минг нафар аҳоли истиқомат қилади.

 

Ҳудудда аҳолининг фаровон яшаши учун зарур инфратузилма тизимли равишда шакллантирилган. Жумладан, 20 та болалар ўйингоҳи, 11 та спорт ва воркаут майдончаси, 3 та мини-футбол майдони ҳамда теннис корти барпо этилган. Шунингдек, 2 та мактабгача таълим ташкилотида 500 га яқин бола таълим-тарбия билан қамраб олинган.

 

Маҳаллада иқтисодий фаолликни ошириш ва бандликни таъминлашга ҳам алоҳида эътибор қаратилган. Бугунги кунда 70 дан ортиқ тадбиркорлик субъектлари фаолият юритмоқда. Натижада 1 048 нафар ёшдан 949 нафарининг бандлиги таъминланган.

 

Ҳудудда экологик барқарорликни мустаҳкамлаш мақсадида 2022 йилда экобоғ ташкил этилган бўлиб, унда 4,5 минг тупга яқин дарахт парвариш қилинмоқда. Бундан ташқари, маҳаллада аҳоли учун “Нуронийлар маскани” ҳам фаолият юритиб, ижтимоий муҳитни мустаҳкамлашга хизмат қилмоқда.

 

Давлат раҳбари хавфсиз муҳитни таъминлаш борасида амалга оширилаётган ишлар билан ҳам танишди. Турar жойлар кириш қисмларига замонавий кузатув камeralари ўрнатилиб, ҳудудга кириш-чиқиш жараёнлари рақамли технологиялар асосида назорат қилинмоқда.

 

Президент Шавкат Мирзиёев маҳалла фаоллари ва нуронийлар билан суҳбатда обод ва барқарор маҳалла жамият таянчи эканини таъкидлади ҳамда тинчлик, ҳамжиҳатлик ва ижтимоий бирдамликни мустаҳкамлаш муҳимлигини қайд этди. Шунингдек, давлатимиз раҳбари сумалак сайлида иштирок этиб, маҳалла аҳолиси ва болалар билан мулоқот қилди. Спорт майдончасида ёшлар билан учрашувда соғлом турмуш тарзи ва жисмоний фаолликнинг баркамол авлодни тарбиялашдаги ўрни алоҳида таъкидланди.