Россияда миллиардерлар сони ва уларнинг бойлиги рекорд даражага етди
Миллиардерларнинг умумий бойлиги 696,5 миллиард долларни ташкил этиб, тарихий максимумга чиққан.
Россияда доллар миллиардерлари сони ва уларнинг умумий бойлиги бўйича янги рекорд қайд этилди. Бу ҳақда Forbes журналининг рус нашри томонидан 2026 йил учун тузилган рейтингда маълум қилинди, дея хабар бермоқда DW.
Рейтингга кўра, мамлакатда доллар миллиардерлари сони Украина уруши бошлангандан кейин 26 фоизга ошиб, 155 нафарга етган. 2021 йилда эса уларнинг сони 123 нафарни ташкил этган.
Миллиардерларнинг умумий бойлиги 696,5 миллиард долларни ташкил этиб, тарихий максимумга чиққан. Қайд этилишича, уруш ва халқаро санкцияларга қарамай, бу кўрсаткич бир йил ичида 11 фоизга ошган.
Жорий йилги рейтингда “Северстал” компанияси раҳбари Алексей Мордашов ва унинг оиласи 37 миллиард доллар бойлик билан биринчи ўринни эгаллаган. Forbes маълумотига кўра, бу Россия тарихида илк бор бир шахснинг бойлиги 30 миллиард доллардан ошган ҳолатдир.
Иккинчи ўринда “Норникел” раҳбари Владимир Потанин (29,7 миллиард доллар), учинчи ўринда эса “Лукойл” асосчиси Вагит Алекперов (29,5 миллиард доллар) жойлашган.
Топ-10 рўйхатидан Леонид Михелсон, Сулайман Керимов, Владимир Лисин, Геннади Тимченко, Андрей Мелниченко, Михаил Фридман ҳамда Алишер Усмонов ҳам ўрин олган.
Шунингдек, мамлакатдаги энг бой аёл сифатида Татяна Ким қайд этилган бўлиб, у 8,1 миллиард доллар бойлик билан рейтингда 23-ўринни эгаллаган.
