Самарқандда жисмоний тарбия ўқитувчиси ўқувчиларни калтаклади
У кечаси 4 нафар ўқувчиларни уйидан олиб чиқиб кетган.
Самарқанд вилояти Нуробод туманида мактаб ўқитувчиси билан боғлиқ ҳолат юзасидан хизмат текшируви ва тергов ҳаракатлари бошланди. Бу ҳақда вилоят мактабгача ва мактаб таълими бошқармаси маълум қилди.
Қайд этилишича, тумандаги 20-мактабнинг жисмоний тарбия ўқитувчиси вояга етмаган ўқувчиларга нисбатан зўравонлик ишлатгани ҳақидаги хабарлар юзасидан ҳолат атрофлича ўрганилмоқда.
Дастлабки маълумотларга кўра, педагог кечки вақтда тўрт нафар ўқувчини яшаш манзилидан олиб чиқиб, уларга нисбатан куч ишлатган.
Вилоят бошқармаси таълим муассасаларида ҳар қандай босим, психологик ёки жисмоний зўравонлик мутлақо қабул қилинмаслигини ҳамда бундай ҳолатлар қатъий қораланишини таъкидлаган.
Ҳозирда ҳолат ҳуқуқни муҳофаза қилувчи органлар билан ҳамкорликда атрофлича ўрганилмоқда. Ўрганиш якунларига кўра қўшимча маълумот тақдим этилиши маълум қилинди.
