Тошкентда йилига 3 миллион харидорга хизмат кўрсатадиган мажмуа қурилди
Лойиҳага 25 миллион доллар инвестиция йўналтирилиб, 2 минг нафар фуқаро иш билан таъминланди.
Президент Шавкат Мирзиёев Тошкент шаҳри Мирзо Улуғбек туманида янги бунёд этилган “Pavilion” савдо мажмуаси фаолияти билан танишди.
Сўнгги йилларда мамлакатда қурилиш материаллари саноати изчил ривожланиб, ишлаб чиқариш билан бир қаторда савдо ва сервис инфратузилмасини замонавий асосда шакллантиришга алоҳида эътибор қаратилмоқда. Мазкур мажмуа ана шу ёндашувнинг амалий намунаси бўлди.
Инвестор томонидан лойиҳага 25 миллион доллар инвестиция йўналтирилган. Мажмуа 4,6 гектар ҳудудда барпо этилган бўлиб, 42 минг квадрат метр қурилиш ишлари амалга оширилган. Ҳудудда 1 минг ўринли автотураргоҳ ҳам ташкил этилди.
Уч қаватли бинода савдо дўконлари, кенг йўлаклар, қулай жамоат майдонлари ва харидорлар учун замонавий шароитлар яратилган. Энг муҳими, бу ерда қурилиш материаллари савдосини тарқоқ ва тирбанд шаклдан чиқариб, тартибли ҳамда шаффоф тизим асосида йўлга қўйиш кўзда тутилган.
Мажмуанинг муҳим жиҳатларидан бири сифатида 2 минг нафар фуқаронинг иш билан таъминлангани қайд этилди.
Президентга мажмуа фаолияти ва имкониятлари ҳақида ахборот берилди. Давлат раҳбари савдо расталарини кўздан кечирди.
Бу ерда 500 та дўконда қурилиш ва таъмирлаш учун зарур маҳсулотларни бир жойда харид қилиш имконияти яратилган. Барча маҳсулотлар ва уларнинг нархлари ягона электрон платформа орқали очиқ ва шаффоф кўринишда тақдим этилади. Бу эса тадбиркорлар ҳамда харидорлар учун қулайлик яратади.
Мажмуа йилига 3 миллионгача мижозга хизмат кўрсатиш қувватига эга бўлади. Ҳудуд хавфсизлигини таъминлаш мақсадида савдо комплекси 500 та замонавий кузатув камераси билан жиҳозланган.
Президент Шавкат Мирзиёев ушбу маскан шунчаки савдо нуқталари жамланмаси эмас, балки қурилиш материаллари бозорида янги маданият, сифат ва хизмат стандартларини шакллантирувчи марказ бўлиши кераклигини таъкидлади.
Шунингдек, давлат раҳбари миллий маҳсулотларга кенгроқ ўрин бериш, маҳаллий ишлаб чиқарувчиларни жалб қилиш ва логистика тизимини самарали йўлга қўйиш муҳимлигини қайд этди.
