АҚШда отиш гуруҳи орқали қатл усули қайта тикланди
Энг оғир жиноятлар учун қатл ижроси бўйича янги чоралар жорий этилди.
АҚШ Адлия вазирлиги федерал даражадаги ўлим жазоларига нисбатан амалда бўлган мораторийни бекор қилиб, қатл ижросининг айрим усулларини қайта тиклаш бўйича қарор қабул қилди. Унга кўра, энг оғир федерал жиноятлар бўйича ҳукм қилинган шахсларга нисбатан отиш гуруҳи орқали қатл этиш усули яна расмий тартибга киритилди.
Департамент маълумотига кўра, мазкур чора жамоат хавфсизлигини мустаҳкамлаш, оғир жиноятларнинг олдини олиш ҳамда жабрланувчилар учун адолат тамойилини таъминлашга қаратилган.
Қарор АҚШ президенти Доналд Трампнинг иккинчи президентлик муддати илк кунида имзолаган фармони асосида қабул қилингани айтилмоқда. Мазкур фармонда федерал даражада ўлим жазосини қўллаш доирасини кенгайтириш, ижро жараёнларини тезлаштириш ҳамда энг оғир жиноятларга нисбатан қатъий жавобгарлик чораларини кучайтириш назарда тутилган.
Шунингдек, Адлия вазирлиги қатл протоколига электр стул, газ камераси ва ўлимга олиб келувчи инъекция каби бошқа усулларни ҳам киритиш масаласини кўриб чиқмоқда.
Расмий маълумотларга кўра, федерал қатлларга қўйилган чеклов бекор қилингач, 44 нафар маҳкум бўйича ўлим жазоси юзасидан илтимосномалар маъқулланган. Улар орасида халқаро жиноий гуруҳ сифатида танилган МС-13 ташкилотининг уч нафар аъзоси ҳам бор.
Маълумот учун, АҚШда федерал жиноятлар бўйича ўлим жазосига мораторий 2003–2020 йилларда амал қилган. 2021 йилда у вақтинча бекор қилинган, кейинчалик Байден маъмурияти даврида яна тикланган эди.
