Истанбулда Туркиядаги энг йирик махфий қурол омбори топилди
Сув ости резервуарида қурол ишлаб чиқаришда зарур бўладиган 4 мингга яқин қисм аниқланган.
Истанбул шаҳрининг Пендик туманида махфий сув ости резервуарида ноқонуний қурол ишлаб чиқаришда фойдаланиладиган минглаб қисмлар аниқланди. Бу ҳақда Haberler.com хабар берди.
Маълум қилинишича, полиция томонидан дрон ёрдамида олиб борилган кузатувлар давомида ер остига яширилган сув резервуари аниқланган.
Тинтув чоғида омбордан рухсатсиз тўппонча ишлаб чиқаришда ишлатиладиган 3 092 та деталь, 1 869 та затвор (қурол ичида ўқни жойлаш, отиш ва чиқариш жараёнини бошқарадиган механизм), шунингдек турли хил бошқа қурол қисмлари мусодара қилинди.
Операция доирасида 4 нафар гумондор қўлга олинди.
Ички ишлар бошқармаси баёнотида қайд этилишича, мазкур операция натижасида Туркия бўйича ҳозиргача бир мартада қўлга киритилган энг катта ҳажмдаги қурол ишлаб чиқариш қисмларидан бири аниқланган.
