Исроилнинг собиқ бош вазирлари Нетаняхуга қарши иттифоқ тузди

Исроилнинг собиқ бош вазирлари Нафтали Беннетт ва Яир Лапид амалдаги бош вазир Бинямин Нетаняҳунинг ҳукуматига қарши курашиш мақсадида сиёсий иттифоқ тузди. Улар бу қарорни жорий йил охирида ўтказилиши кутилаётган сайловлар арафасида эълон қилди, дея хабар бермоқда Al Jazeera.

 

Маълум қилинишича, томонлар ўз партияларини бирлаштириб, “Бирга” (Тогетҳер) номли янги сиёсий блок тузаётганини маълум қилди. Унга Беннетт раҳбарлик қилади. Иттифоқдан асосий мақсад — Нетаняхуга қарши пароканда мухолифатни бирлаштириш экани таъкидланди.

 

Беннетт ва Лапид қўшма баёнотда ушбу қадамни “мамлакат манфаатлари йўлида муҳим сиёсий қарор” деб атади. Лапид эса Беннеттни “ўнг қанот сиёсатчиси, аммо ҳалол инсон” сифатида таърифлаб, улар ўртасида ўзаро ишонч мавжудлигини қайд этди.

 

Шунингдек, Беннетт сайловда ғалаба қозонган тақдирда, 2023 йил 7-октабр куни ҲАМАС томонидан амалга оширилган ҳужум олдидан юзага келган камчиликларни ўрганиш бўйича миллий тергов комиссияси тузилишини билдирди. Амалдаги Нетаняхунинг ҳукумати бундай ташаббусни рад этган.

 

Иккала сиёсатчи ҳам Нетаняхунинг хавфсизлик ва ташқи сиёсат борасидаги қарорларини танқид қилиб келмоқда. Хусусан, Лапид Эрон билан эришилган икки ҳафталик сулҳни “сиёсий фалокат” деб баҳолаган.

 

Беннетт ва Лапид аввал ҳам 2021 йилда иттифоқ тузиб, Нетаняхунинг 12 йиллик ҳокимиятига якун ясаган эди. Бироқ улар тузган коалицион ҳукумат 18 ой фаолият юритиб, парчаланиб кетган.

 

Сўнгги сўровлар Нетаняху ва Беннетнинг шахсий рейтинглари деярли тенглашганини кўрсатмоқда. 23 апрель куни эълон қилинган N12 News сўровига кўра, Беннетт бошчилигидаги кучлар парламентдаги 120 ўриндан 21 тасини қўлга киритиши мумкин, Нетаняҳунинг “Ликуд” партияси эса 25 ўринга эга бўлиши прогноз қилинган. Лапид партияси эса ҳозирги 24 ўриндан 7 тасигача қисқариши мумкин.