Гран-при совриндорига 7 минг АҚШ доллари берилади
Лазги фестивали доирасида матбуот анжумани ўтказилди.
Юқори ҳарорат ва жозибани ҳаракатларда мужассам этган Лазги фестивалининг беллашув жараёнлари 26 апрелдан старт олди.
Шунингдек, Хоразмнинг юраги Хива шаҳрида 26–30 апрель кунлари бўлиб ўтиши режалаштирилган фестиваль доирасида журналистлар учун матбуот анжумани ташкил этилди. Унда нафақат маҳаллий ОАВ, балки хорижий журналистлар ҳам иштирок этди. Бўлиб ўтган анжуманда III “Лазги” халқаро рақс фестивали билан боғлиқ барча маълумотлар айтиб ўтилди.
Тадбир якунида Хитой, Ҳиндистон ва бир қанча чет эллик журналистлар томонидан турли хил саволлар ўртага ташланди ва модераторлар томонидан аниқ жавоблар берилди.
Фестиваль жараёнларини ёритиш мақсадида 100 га яқин маҳаллий ва хорижий ОАВ вакиллари иштирок этмоқда. Жозибадор ўзбек миллий рақс санъати дунё нигоҳида ўз жилосини тараннум этади.
Айтиш жоизки, 2022–2024 йилларда Хоразм вилоятининг Хива шаҳрида бўлиб ўтган I ва II “Лазги” халқаро рақс фестивалларида дунёнинг 30 дан ортиқ давлатидан истеъдодли раққосалар, профессионал рақс жамоалари, рақс санъати усталари, мусиқашунос ва санъатшунос олимлар, таниқли санъаткорлар, етук мутахассислар, фахрий меҳмонлар ва оммавий ахборот воситалари ходимлари иштирок этган эди. Мазкур халқаро фестивалнинг навбатдаги сони 26–30 апрель кунлари бўлиб ўтиши режалаштирилган.
“Лазги” халқаро рақс фестивали 2022 йилдан буён ЮНЕСКО шафелигида ўтказилаётган бўлса, 2026 йилдан бошлаб илк бор ТУРКСОЙ халқаро ташкилоти ҳам шафелик қаторига қўшилди.
Танлов ғолиблари Ташкилий қўмита томонидан диплом, статуэтка ва турли хил миқдорда пул мукофотлари билан тақдирланиши маълум қилинди. Унга кўра, энг олий ўрин “Гран-при” совриндори 7 000 АҚШ доллари миқдоридаги пул ва эсдалик совғалари билан тақдирланади.
